Day 17
旅遊巴於早上六點準時到達拉巴斯, 但大部份巴士公司office仍未開門, 所以等到開門先去格下價, 最終買了Internacional Continente的過境巴士回Puno(BOB$130)~ 上車前在巴士站的快餐店食火腿飛碟做早餐(BOB$8)~ 班車於早上八點半開出, 呢間公司採用Benz雙層旅遊巴, 比去程Titicaca的豪華,過境亦唔需要轉車, 但當然人還是要落車過海關~ 下午一時二十分抵達Puno, 隨即去找往阿雷基柏(Arequipa)的巴士, 很好彩地找到Tranzela公司有兩點十五分開出的班次(PEN$30), 不用在巴士站等太久~ 晚上八時終於抵達目的地阿雷基柏, 前前後後共花了廿四小時traveling, 實在攞命~ 之後打的從巴士總站到入住的Hostal Santa Marta(PEN$5)~ Hostal Santa Marta距兵器廣場不遠, 評價甚佳, 雙人房每晚PEN$100~ Settle好本來打算到兵器廣場附近的Manolo's餐廳食飯, 點知太夜好多野都冇得食, 結果改到隔離老麥食Chicken & Bacon McWrap(PEN$9.9)~

Day 18
Hostal Santa Marta的早餐都不錯, 除左麵包和cereals, 當日有芝士和火腿, 翌日就有炒蛋~ 食完就到兵器廣場參觀Basilica Cathedral of Arequipa, 還去左附近D travel agents搵下local tour~ 接著就到被譽為市內最美麗的建築物Monasterio de Santa Catalina參觀(PEN$35)~ 修道院倘大, 有多個庭園, 不同區域的牆壁有紅有藍, 顏色鮮艷~ 有些牆上也繪有壁畫, 房間又擺放了不同的聖物, 古舊的陳設盡量都保持原汁原味~ 另外還有個種滿花卉的花園和畫廊~ 行左個幾鐘就回hostel休息, 中午去了兵器廣場附近一間較多當地人食的餐廳~ 我和拍檔都點了個相同的一人餐(PEN$18.5), 上菜時就知道中伏, 個餐有燒雞半隻 + 炸雞兩大件 + 沙律 + 大量薯條, 完全係冇可能食得晒, 兩個人share一份就差唔多~ 另外叫左一jar Chicha粟米汁, 顏色呈深紫色, 好甜下~ 下午兩點就join左個countryside bus tour(PEN$20), 坐雙層巴士遊覽阿雷基柏周邊~ 第一站係去Mirador de Yanahuara看個拱門, 從那裡可以望到阿雷基柏的三大火山: Chachani, Misti和Pichu Pichu, 不過當日有煙霞影響景觀~ 第二站就係另一個觀景地點Mirador de Carmen Alto~ 該處有田野, 綠油油一片, 同樣都望到火山~ 在小商店試左杯阿雷基柏傳統雪糕Queso Helado Arequipeño(PEN$3), 是肉桂加牛奶味的雪葩, 都幾好食, 消暑一流~ 第三站就去左一間賣羊駝毛時裝的outlet, 可以一次過睇晒四種草泥馬 - llama、alpaca、vicuna、guanaco~ 前兩者是圈養的, 後兩者是野生的~ 隻vicuna真係好鐘意吐口水, 令途人退避三舍~ 第四站就到La Mansion del Fundador, 需付入場費看古建築~ 我們都沒太大興趣, 所以沒有入場~ 最後一站就去Paucarpata睇下D梯田和幫襯下D小食檔, 而小朋友就租下馬仔騎~ 回到兵器廣場已是傍晚六點幾, 去左獲tripadvisor好評的高級餐廳Qaya食晚餐(PEN$46)~ 點左個沙律、Causa de Camarones牛油果蝦仔薯蓉和Rocoto Relleno釀辣椒~ 個薯蓉有芝士和龍蝦汁, 味道不錯, 但好滯~ 釀辣椒都幾辣, 入面釀左芝士和肉醬, 還有薯蓉伴碟, 同樣係好滯~

Day 19
自從前年去左沙巴玩過激流之後, 就愛上左呢個玩意~ 阿雷基柏有得玩就當然報黎玩下, 仲要講價講到PEN$55, 真係抵到爛~ 在酒店食完早餐約八點鐘就有車黎酒店pick-up, 一共有十五六人一齊玩, 有local客又有遊客~ 先到rafting公司的office換衫, 裝備齊全, 有wetsuit、water shoes和風褸, 完全唔駛整濕自己D衫褲鞋襪, 值得一讚~ Rafting的地點是在River Chili的上游, 其實距離市中心不遠, 非常方便~ 整裝待發後, 每四人分配一艘艇加個guide, 然後就落水~ 個course長度約六公里, 玩左約四十五分鐘, 共有六個rapids~ 河流喘急度同沙巴嗰次差唔多, 都有3-4級~ 今次D rapids就少D, 不過都幾刺激過足癮~ 途中亦有專登落水浸下, D水都幾凍下~ 過程中有專人影相, 價錢都算合理(PEN$20)~ 十一點幾返到hostel沖個涼就check-out, 去左間非常多本地人幫襯的餐廳Picanteria la Mundial, 食地道的阿雷基柏菜, 值得推薦~ 我們點了Locro de Pecho薯仔牛腩飯和Chupe de Camarones小龍蝦南瓜濃湯(PEN$28.5)~ 前者份量十足, 牛腩有少少韌, 味道一般~ 後者其實係主食黎, 除左小龍蝦, 內有飯、芝士粒、蛋、薯仔、南瓜, 鮮味濃郁, 亦很飽肚~ 下午主要都是在兵器廣場附近閒逛, 買下手信~ 到了五點半左右就打的往機場(PEN$20)~ 我和拍檔又再次分道揚鑣, 我將搭早一班機飛利馬再到達拉斯, 而佢就搭遲一班機經利馬到邁亞密, 然後再去蒙特利爾~ 我搭的LAN航班(USD$149)於下午七時十五準時起飛, 並在個半小時後抵達利馬~ 距離下一班機還有四小時, 不過都先去check-in放低行李, 但去到已經有人在排隊而且每個人都要在櫃台搞好耐, 心知不妙~ 等左成粒鐘先排到我, 得知去達拉斯班機原來要延誤至翌日下午, 結果美國航空安排我轉搭聯合航空晚上十一時五十分的班機先飛侯斯頓, 然後再飛達拉斯, 實際上只是比原定時間遲個零鐘, 都算好彩~ 匆匆趕去check-in, 別了南美, I will be back!

成功發佈