Day 4 凌晨四點就搭Benz商務車前往trekking的起點, 兩個幾鐘頭的車程都是半睡半醒~ 到達起點附近的村落食個早餐, 然後就跟馬伕匯合, 準備起程~ 先講講我們的團隊, 團友只得四人, 比想像中少~ 除左我跟拍檔之外, 仲有兩個跟我地年紀相約的加拿大女仔Sarah和Callen~ Serve我地嘅就有三人, 分別係mountain guide Roily、星級大廚James和馬伕Papachon~ 差不多近九點先開始起步, 先上少少斜, 然後都是沿山腰走的平路, 沿途都望到雪山~ Roily也有介紹當地特色植物和文化, 當中包括o趙coca leaf的正確方法~ 古柯葉在當地印第安人的傳統文化中很重要, 含有古柯鹼, 有提神作用; coca tea在秘魯很普遍, 幾乎間間餐廳和旅館都有得飲, 味道幾特別, 但談不上好喝~ 十一點幾就到達Soraypampa營地(3850m), Papachon已經幫我地扎好晒營, 背住個雪山黎露營的確別有風味~ 在營中小休一會, 期間下起細雨, 好彩之前行緊嗰時無落雨~ 之後食午餐, 首度試試James的手勢~ 前菜有牛油果nachos、熱菜湯, 主菜就係雞扒飯, 味道非常對辦~ 食飽後約一點就出發上Humantay Lake(4270m)~ 即使只係上行400米, 但成條路都係齋上無平路, 都幾甘下~ 差唔多成三點鐘先上到個湖, 由於狀態不佳, 覺得特別辛苦, 應該都係jetlag的緣故而唔係高反~ 個湖都係一般雪山下的湖泊, 湖水好藍, 不過由於我地去過亞丁、雨崩呢D地方就唔覺特別~ 有個鬼婆仲著埋三點式落水, 認真勇猛~ 反而附近的山谷於雨後畫出彩虹就更搶眼~ 另外又發現原來南美當地都興疊「尼馬堆」, 意思都是為求吉祥, 仲以為係藏民先會咁做~ 行返回頭路落山就快好多, 然後就回營休息等食晚餐~ 晚餐有炸魚食, 最好就係有熱湯飲, 入夜開始凍最啱暖下胃~ 食完飯影左陣星, 冇乜雲之下都算影到銀河~ 影完八點都未夠就瞓覺了~ 點擊圖片放大 +2 Day 5 是日係行得最辛苦的一天, 五點鐘就食pancake早餐~ 收拾行裝後近六點就起行, 要上行800米向4650m的Salkantay Pass進發~ 沿途基本上都冇乜平路, 可望見秘魯第二高峰Salkantay(6271m), 亦好好彩見到Andean fox~ 行到死死下終於響九點幾上到Salkantay Pass, we survive! 在山上飲返杯coca tea兼大休, 同時Roily亦教我地跟大地之母Pachamama祈福(以前會獻祭羊駝或天竺鼠, 甚至有傳祭活人)~ 之後就一直落山, 中午十二點到達Huayracmachay食午餐~ James整左地道的前菜Papa a la Huancaína忌廉汁薯仔和Crema de Zapallo忌廉南瓜湯, 勁好食, 主食就有螺絲粉~ 食食下又落大雨,仲落埋冰雹, 好在食飽準備出發時又轉返細雨, 但都要著雨披行~ 隨著高度下降, vegetation亦有所轉變, 開始多樹木和多蚊~ D蚊好毒, 咬左幾個禮拜先散, 仲有個針窿清楚可見, 勁恐怖~ 四點左右到達營地Chaullay休息, 當日走了約20km, 超攰~ 晚上食lasagna和potato cake, 味道還可以, 看來James還是整秘魯菜較拿手~ 點擊圖片放大 +2 Day 6 是日仍然早起, 六點就食早餐, 然後跟馬伕Papachon farewell~ 行程仍然係繼續下山, 沿途下著微雨, 風景一般, 係有個瀑布睇下咁囉~ 由於落雨的關係, D泥路好爛下, 搞到條褲勁污穢~ 到了中午十二點行到去La Playa的村落食午餐, 今餐James又俾D驚喜我地, 就係整左南美名菜Ceviche檸汁醃魚生~ D魚都醃到七成熟, 開胃好食, 好有泰式feel~ 食飽就搭車去Santa Teresa, 並到附近的露天溫泉hea返陣(車費PEN$10 / 入場費PEN$5 / 租褲PEN$4)~ 三日冇沖涼之下, 有得沖身再浸溫泉確係爽~ 泉水溫度不太高, 對我來說剛好, 仲有無敵山景睇, 非常棒~ 晚上在Santa Teresa的營地搞左個營火晚會, 跟別的團隊一起飲酒、跳舞social下~ 點擊圖片放大 +2 Day 7 早上都係六點食早餐, 臨別在即James整左個蛋糕出黎, 認真犀利~ 然後就去左玩自費項目ziplining飛索(PEN$90), 那裡共有6條不同的cable橫跨峽谷, 全長2500m, 仲可以扮spiderman倒吊黎玩, 又或者扮superman吊吊揈黎玩亦得, 抵玩又好玩~ 玩完再搭車到水力發電站附近, 沿火車軌行兩個幾鐘到熱水鎮, 途中可以遠望到山上的馬丘比丘~ 熱水鎮位於馬丘比丘山腳下, 個tour已經包埋當晚的食宿, 入住Sun Palace Inn~ 休息左陣再到鎮內行下, 好touristy~ 買左D明信片寄, 原來秘魯D郵票好貴下, 一個國際郵票要PEN$7~ 晚上在旅館附近的餐廳用膳, 算是我們團隊最後的晚餐~ 點擊圖片放大
