#25/10/2014 搭濟州航空既零晨機去到首爾, 唔多訓到, 好眼訓。 出到去就搵長途巴士站, 時間啱啱好, 成粒鐘一班既車仲有2分鐘開車。 渣渣淋買飛上車, 原來每個站都唔同錢, 要講清楚邊個站。 我係搭去春川既車, 嘩張櫈勁豪華, 個位仲要極闊, 仲勁過頭等。 響金浦機場有好多記者圍住架私家車, 疑似有韓星, 不過睇唔到。。。 沿路已經有唔少銀杏同紅葉, 但個位實在太舒服, 不能自拔咁釣魚, 仲要塞車喎, 好難先控制住唔好昏迷, 因為要落中途站(加平)又唔識路。。。 終於到喇, 搵到hostel擺低d野, 抖陣就出去喇。去問hostel個唔多識英文既大叔點去地鐵站, 佢講完一輪叫我跟佢行, 原來佢車我出去!!! 超級好!!! 搭地鐵去春川, 沿途風景好靚, 唔怪得係住首爾韓國人既郊遊勝地。去春川緊係要食春川辣炒雞, 雖然我唔多食得辣。。。 春川站出多人嗰面, 一出就有個遊客中心, 有春川地圖攞, 有中文, 旅遊書話搭巴士, 但個靚女話可以行 3個字到, 費事排隊等車就行。一條大直路行到有地下街入口再轉個靚彎就差唔多到。 去到行哂成條街睇睇個埸先, 好似話因為規管咗所以間間價錢一樣/差唔多, 大概￦10000-11000。 揀咗間細細地但又有電視臺拍過, 好韓式而且得本地日既試, 間野叫青山。 入去揀咗韓式位坐地, 腳痺都要試一次。 阿珠媽好好人咁遞咗條圍裙俾我, 睇返好多呢d舖頭都有圍裙借俾客人, 唔想整烏糟件靚衫就記住攞喇。 D野食黎到係唔使自己郁手㗎, 會有阿珠媽自己埋黎炒你d野。 炒野裏面除咗雞仲有年糕同蔬菜配菜, 另外再有kimchi, 蘿白湯, 同埋生既菜, 係用黎俾你整生菜包, 唔使省住, 食哂會免費幫你加。 食係幾好食既, d雞好滑好juice, 辣就飲下水救火都仲可以。 食完響隔離既購物街兜咗個圈, 咁啱有作品展, 呢度d人興覺得嗰幅畫好就貼d野食或者錢響幅畫度, 好得意。 再行就係市場, 係好for本地人既市場, 都係d生活所需, 冇遊客野。 最值得睇係好多韓服舖, 全部都係買布料再訂做, 好地道。 行完本身諗住去蕎麥麵體驗館, 但搵咗好耐都搵唔到巴士站, 而且架車仲票一粒鐘一班, 又攰, 都係打道回府算。 地鐵返加平其實就唔耐, 但上車一坐低就已經自動待機lol, 只不過係4點鐘。 返到hostel抖陣, 差唔多就出去食飯。 響呢d鄉下地方本來想試下地道野, 但完全唔認韓文既我真係無從入手, 最後食咗間有圖既拌飯。食完返去全速沖涼訓覺。 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
