#Rome, Italy #Beijing, China #03/07/2013 M: Termini-line A->Ottaviavio-S.Pietro 一早就搭地鐵去傳說中既煩過梵蒂岡, 一定要早去, 如果唔係超多人排隊。入聖彼得大教堂Basillica di San Pietro有嚴格規定唔可以著短褲同背心, 亦都唔會供應袍俾你著。 女士如果著短褲可以包條巾當裙, 男既就唔如意思喇! 背心話加件褸仔就ok。我就毫無準備咁中哂, 好彩出動埋背囊個raincover, 左砌右砌又搞掂。 入面冇電視影到咁大咁靚, 我知, wide angle呀嘛。講建築其實好多教堂都靚過佢, 但係佢有唔少精緻野同埋最重要既係有代表性。返出黎嗰時條隊真係超勁多人, 好彩早黎。 梵蒂岡雖然響意大利入面, 但其實係個獨立既國家, 亦都好似係全世界最細既國家。 佢d兵既制服好得意, 好似小丑。 佢都有自己好郵政, 鍾意寄postcard既唔可以錯過! 行去聖天使堡Castel San Angelo, 係個有星形圍牆既圓形既城堡, 出面既聖天使橋有好多唔同既天使雕像, 冇入到去, 響出面影下相就算。 話說我同房咁啱都響羅馬上緊堂, 佢琴日夜晚晚(響羅馬喎)行黎我hostel搵我仲要等我勁耐。 點知我因為轉咗房收唔到wifi完全唔知佢響出面, 殺咗我喇! 今日我就行去佢studio負荊請罪。 響冇3G冇電話既世界, 我地成功會合! 一齊食咗個pizza, hea咗陣就byebye喇。 行去海神噴泉San Luigi dei Francesi, Piazza Navona, Fontana dei Fiumi, 其實呢3樣既響同一個地方。 行去萬神殿Patheon, 出面有有個水喉位俾人飲水/降溫, 意大利好多地方都有, 響咁熱既地方真係好甘露。 萬神殿入埸竟然唔使錢喎。 佢設計到屋頂個癃入去既陽光唔同時間會幫唔同既神打燈。 行唔遠就係許願泉Fonta di Trevi, 真係好多人。 同想像唔同既係佢廣場仔都冇個, 好似響橫街窄巷突然有個景點咁。 繼續行去骸骨寺Cripta Capuccini收咗工冇得睇。 行咗咁耐終於行去最後一站西班牙廣場Piazza di Spagna, 我係由上面落去。 如果響下面想上面睇下既, 其實地鐵站出面有可以搭。 M: Spagna -lineA-> Termini 返去去附近間超市切Parma ham帶返屋企, 響意大利真係平靚正又易買, 仲易過去斬大舊叉燒。 執埋野就搭旅遊巴去機場, 一個月既旅程就咁如夢似幻咁完咗。好唔捨得 去到機埸使埋淨低少少歐羅散紙, 食最平既茄汁pizza, 係呀真係得茄汁。無謂再唱散d大錢唱唔返吖。 中航delay是常識吧, 好彩今次delay 2個鐘就飛到, 真的要走了 Plane: Rome FCO -> Beijing PEK Dur: 11:15 2055/1310 (officially) Delay 2 hr 咁delay咗2個鐘去到北京就要趕轉機喇, 本身都心諗實又delay喇趕甚麼, 點知一落機個地勤狂趕我地跑, 怒跑完一輪去到閘口, 真係整你個制架機都未黎即係又delay喇! 跑乜野呀?! 由3點幾等到天黑, 又冇野食又唔走得。 佢話因為天氣關係要延誤, 天朗氣清萬里無雲囉老細, 吹都用下腦喇! 我知成日軍演, 你唔係有無限時間都千祈唔好搭中航或者飛北京上海轉機。 等到天荒地老冇可能飛到就知今晚要響北京訓。。。大陸d安排真係差香港非常多, 成班人要排十九幾萬條隊去搞d搞路, 但佢又唔會話你知㗎喎。 我見到有班香港學生單數女仔就主動join埋咗, 航空公司係唔會理你識唔識, 總之兩個同性一間房。 同香港女仔點都好過大陸大嬸吖。 跟著有2公婆老人家話唔識普通話想跟著我地, 跟著又有2個鬼仔完全唔知發生乜事, 再有幾個學生好搞笑咁組成咗個互助團分頭行事。唔知點解人總係要唔響自己地方先會特別識互相幫助。 搞一大輪終於到酒店, 佢提供既晚餐係康師傅紅燒牛肉麵一個連水都冇支?! 係人唔係呀? 嗰度荒山野嶺好彩隔離仲有間串燒舖仔, 嗰兩公婆話一齊去隔離食串燒。 一齊吹水喇, 嗰兩公婆原來差唔多一齊環遊咗世界, 好幸福呀! 佢地仲埋咗張單話請我地食野多謝我地幫咗佢地添! 其實都唔係吖, 不過多謝哂。 食完渣渣淋沖涼訓覺, 第朝又一早起身撲機位。 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/
