我本身對日本無太大好感，自問唔係特別喜歡shopping，又唔太想去到邊都見到香港人，所以今次選擇日本北九州！有人話九州是鄉村地方，覺得很悶，但我反而覺得有一份悠閒的感覺，有熱鬧的購物點又有怡人的景色，絕對適合不喜歡跑景點、想好好休息避開人群的你！ 因為好想休息下享受假期，所以揀左中午時間搭飛機，1305機，不過坐得HKExpress都預左一分錢一分貨，上機之後delay左2個鐘，最後日本時間7點幾先到福岡機場。 福岡機場唔算大，入境都唔算等太耐，大概半個鐘就完成哂。出左黎之後，要搭10分鐘的免費接駁巴士由國際線既terminal轉去日本內陸線既terminal，之後轉搭地鐵。 地鐵搭兩個站就到博多站喇，承惠¥260。好方便！ 呢張飛記得要好好keep到出閘，因為小編好蠢，試過入閘時唔記得拎飛，出閘既時候要買多次飛 博多站超級大... 出閘後上一層就會見到辦理JR PASS既地方。因為已經係旁晚，完全唔洗排隊。我地係喺HKExpress飛機上買5日的北九州JR PASS，即日要係呢到換返做正式個張。因為今日已經唔會再去邊到喇，所以我地選擇左聽日先開始用張JR PASS。 博多站其實好多商場地下街可以行，不過我地太餓，係對面既牛角包店買返個牛角包食先！il forno del mignon好出名，好多人都會特登黎排隊買。 明太子冷烏冬 - 福岡出名明太子，當然要試下喇 站員推介的牛肉粒(?) - 朋友形容為入口即溶既牛腩... 我就覺得有啲肥，要夾埋啲蒽食先得 明太子蛋捲 - 好滑，加埋明太子少少辣，好味！不過有啲膩 做緊promotion既1蚊酒，由於驚係伏，所以叫左杯啤酒以仿萬一，結果，真係伏左。 食飽飽就返屋企休息嚕，街上仲有啲人，唔算好靜。 -- 完整行程 Day 1: 搭HKExpress至福岡機場 > 入住博多站旁的Airbnb > 搵食！ Day 2: 博多一番街 > 門司港 > 唐户市場 > 小倉 > 食串燒！ Day 3: 博多 > 熊本 > 城彩苑 > 加藤神社 >上通町、下通町 > 博多 Day 4: 博多 > 佐世保 > 九十九島 >長崎 > 稻佐山夜景 > 博多 Day 5: 博多 > 天神地下街 > 博多車站買手信 Day 6: 博多一番街 > 福岡機場返港
