又搬竇， 試下呢邊效果， 舊文去返以前嗰度睇啦。 今次經歷咗人生第一次嘅開鎖，之後再做咗一啲資料搜集，當然都係同大家分享啦。 我會先講揾開鎖佬嘅方法， 再講我既慘痛經歷， 總結黎講， 我發現開鎖黎行， 香港係完全冇王管，買張太空卡，做個網址，甚至乎facebook開個專頁就可以做生意。 真係唔講得笑， 就算你遇到幾差嘅假專家，幾無賴嘅褔街，你都冇佢符，因為佢隨時連商業登記都冇，攞個新電話號碼又可以復活，你想唱衰佢都冇用。 就當你上google搵開鎖佬，你可能見到有十間公司，但係隨時有五六間都係同一條褔街開囉，你以為有選擇，其實打嚟打去都係同一條友聽囉。 所以我得出以下揾開鎖佬最安全既方法： 1. WhatsApp group問朋友， 要講明用過既先好介紹， 朋友試過ok無理由到你又會出事啦 2. 問樓下保安， 如果保安有開鎖佬介紹，應該會比網上既好， 同個開鎖佬係之前有黎過先啦。 3. 最後無計都只好上Google啦， 我唔理你打開鎖， 跑馬地開鎖， 定係Yale開鎖， 都係會見到嗰十幾間公司，佢哋已經用盡曬方法霸曬google頭幾版，你冇可能就得甩。 就呢十幾間公司，裏面我敢講，只有兩三間係真正嘅開鎖公司， 其他都係搵笨實。 但係好彩， 通常啲福街開鎖佬都有一個特徵，佢哋好鍾意用平去引你㩒落去。 總之，寫住99蚊開鎖，100蚊開鎖，200蚊開鎖，免費開鎖嘅網頁，千祈唔好揀 再講多兩次，千祈唔好揀，千祈唔好揀。 另外我仲見到有啲網頁或者apps， 係會幫你做配對， 幫你搵最好嘅師傅， 就呢件事我問過一個真正嘅開鎖佬，佢同我講， 好嘅師傅係唔會經呢類網頁或者apps去搵生意， 咁我聽完後， 結論就係 咪俾錢中介！ 睇完上面嘅講解，我相信你哋都開始識得搵開鎖佬，係揾真正嘅開鎖佬， 咁我而家開始分享我嘅慘痛經歷。 話說我搭飛機返嚟， 返到香港我先發覺我真係搵唔到抽鎖匙， 最慘嘅係我臨出門時我將所有嘅鎖全部lock死曬， 咁我上google搜尋我住嗰區嘅開鎖公司， 我當時係打九龍灣開鎖， 就揀咗一個電話打咗去問 ,聽把聲 , 同我對話嗰個應該都係廿零三十歲， 依家諗返轉頭， 其實呢個褔街開鎖佬好有問題， 但我同好多人一樣都係第一次， 所以真係中曬計。 第一，佢其實冇報個實價畀我， 佢同我講顧問上門費收我$500蚊上門睇睇， 真實意思即係話， 條褔街上到嚟乜嘢都唔做，佢已經可以收$500, 因為我應承咗佢上門費。 第二個問題係， 佢曾經叫我影張身份證畀佢睇， 最後我梗係唔制啦， 佢就話係行規， 咁佢都問我攞咗身份證英文字加頭四個數目字， 我都照畀咗佢。 但其實，如果佢有我HKID加上我嘅詳細地址，其實真係好危險，廣告都有講啦 一個電話，住址， 身份證，申請即時批核， 真係唔好試。 等咗半個鐘見到個後生仔黎， 佢攞兩支針型嘅嘢，插入個鎖窿搖嚟搖去， 3分鐘之後就同我講， 話我個鎖太舊， 可能都有啲問題...後加100個理由， 之後就話要爆鎖， 又話我個鎖唔好，好難爆， 最後話爆鎖要加$1,400。 問題係， 我地只係講緊個鐵閘， 仲有個大們都未開始， 我真係唔知最後要比幾千之返到屋企。 到咁既形勢， 我死唔信開鎖係咁高消費， 最多咪去朋友屋企住幾日， 再DHL鎖匙好未先？ 咁只好比$500叫個褔街開鎖佬走啦。 去到樓下同個保安講單野啦， 保安話個開鎖佬無登記， 話係我朋友， 真係吹Q漲， 之後， 保安話比另一個開鎖佬嘅卡片我試試， 咁打個電話試吓， 都叫買個希望啦。 另一個電話就堅係兩個世界， 我WhatsApp兩個鎖比相佢睇， 開鎖佬好有信心話可以開到， 仲要係講到明開唔到唔收錢， 話收我$680, 我比個地址佢之後仲講到會泊車去邊， 明顯係好熟路啦。 等咗又係半個鐘左右， 開鎖佬黎到， 感覺係一個開鎖佬既物體但係教師咁既靈魂， 真係估佢唔到咁詩文， 開鎖又好定又唔急， 無十分鐘就開到曬。 我同佢講返之前個褔街開鎖佬， 佢話都見怪不怪， 見佢都唔係好肯講太多， 只係猛咁安慰我， 話問題攪掂咗就算， 又話個褔街開鎖佬有我地址， 啲咁危險既人都係少接獨為妙， 我都話我一定會上網唱衰佢。 不過，講到明邊間都係無意思， 太家上Google自己睇睇啦
