食欲之秋，特別掛住日本嘅肥美海鮮～

其中特別係燒烤！將新鮮海產放上爐燒...諗起都流口水呀！

最近食咗間唔錯嘅浜燒水產店——「南瀛水產」！店內嘅海鮮均係日本直送，絕對食得返日本嘅原汁原味！而且每張枱前仲有小型烤爐，點完海鮮，仲有專人幫手燒熟，坐定定就有好西食，真係正正子。

另外，佢哋唔止浜燒，仲有刺身、壽司、壽喜鍋及一系列日本清酒特飲，鍾意日本飲食嘅朋友一定大滿足～

▲晚市真係勁多人，插針都插唔入。

▲睇住佢燒，香噴噴流晒口水!

▲燒好啦！強忍住影埋先開動！><;;

除此之外，我好鍾意南瀛水產嘅日式裝潢，日式掛布、木板牆、日本紙遮、字畫.... 真係好有大型嘅居酒屋feel～當晚食完飯，見無咩人，我好無恥地打埋卡先走，哈哈！希望不要令店員困擾啦！

▲好耐無去日本，睇到滿天花板都係彩傘，心情真係好激動～～！

▲好想去日本呀！唯有係度打卡頂住癮先……！

✦蟹味噌甲羅燒 HK$156

浜燒必食蟹味噌甲羅燒！甲羅即係蟹蓋，上面加咗味噌、松葉蟹膏及松葉蟹肉，再撈埋鵪鶉蛋燒，燒完即食，香氣撲鼻、入口甘香，真係超級正！

✦沙白 HK$48

除咗甲羅燒，佢哋呢度仲有室津蠔、帆立貝、活鮑魚等，今次揀咗清酒煮沙白，甘甘苦苦，令沙白肉味道更鮮美，唔錯。

✦牛肉蕎麥麵 HK$78

半生熟牛肉夠嫩滑，蕎麥麵彈牙，唔夠飽，打底點呢個最啱！

✦雲丹蟹肉卷 HK$228

入口先會係口感滑溜creamy嘅海膽，之後係蟹肉壽司卷，個人覺得呢款只屬正常水平，蟹肉太搶味，對比下試唔出海膽嘅鮮甜味。

✦蕃茄沙律 HK$78

酸酸甜甜，柚子醋味道惹味，相當開胃。

✦什錦天婦羅盛合 HK$198

天婦羅炸皮幾薄，酥脆得嚟夠乾身，食落唔會一咀油。

✦唐揚炸雞 HK$68

呢款炸漿好似硬咗啲，感覺有啲似煎堆仔咁硬！咬開入面，雞肉幾鮮甜。

✦真鯛刺身 HK$238

呢款真係勁正，真鯛肉質好鮮甜彈牙，點少少酸汁食，真係好好味！

✦青蘋果乳酸 HK$68

呢款清清甜甜，唔會太甜太膩，小朋友應該幾鍾意。

✦白桃燒酎 HK$68

我較愛白桃燒酌，對比乳酸特飲，佢會無咁甜，清新為主，配海鮮食一流！

P. S. 「浜」字即係「濱」，濱燒意思即係喺岸邊即捕即燒海鮮，喻意新鮮度爆燈嘅海鮮燒烤。

★－:+:－:+:－:+:－:+:－★

味道：4

環境：4.5

服務：4

CP值：3

（*5為最高分）

★－:+:－:+:－:+:－:+:－★

◌ 南瀛水產

◌ 尖沙咀金馬倫道5號太興廣場5樓

★－:+:－:+:－:+:－:+:－★

記得like埋我，每日放送打卡好去處！

ᴿᵉᵃᵈ ᴹᵒʳᵉ