唔知大家覺得過橋米線係點嘅樣呢？原來傳統嘅過橋米線係米線同所有配料分開上菜，再配上新鮮滾熱辣嘅湯，係上菜之後先混合所有配料同埋米線，再利用湯嘅熱力去燙熟所有食材，最近試咗一間新開嘅舖頭專門食過橋米線，感覺都幾特別想推薦俾大家！餐牌上菜式選擇唔多，主要都係小食，過橋米線同埋客飯為主，我哋當然食主打嘅過橋米線啦！過橋米線選擇都幾多，首先麵質方面可以揀普通米線或者來自雲南嘅七彩麵，聽店員講七彩面係用唔同嘅蔬菜製造出嚟，香港比較少有架！另外店舖標榜湯底全部用雞骨作為主調，分別有特色湯，酸菜湯，番茄湯，香辣湯同埋雜菌素湯。配料都有四種套餐選擇，我哋揀咗個最特別嘅香格里拉套餐，裏面包含原隻鮑魚，大蝦同埋帶子，仲有另外七款配料，感覺超豪華！我哋今次揀咗特色湯，酸菜湯同埋蕃茄湯試吓！一上菜嗰陣覺得擺盤好靚，睇落去好精緻好適合打卡，之後湯底上菜嗰陣我哋都覺得好特別，佢用咗特別嘅器皿去裝上湯，感覺就好似迷你嘅大醬缸咁，而且保溫效果超級好，由開始食到結束都感覺到湯底仲係有熱度架！三款湯底我都飲過，感覺冇味精喺裏面，湯底比坊間嘅米線店淡，特色湯飲落幾特別，唔係平時飲到嘅味道，但係有少少酸辣嘅感覺，配上其他配料同埋七彩面我覺得係唔錯嘅！至於蕃茄湯底係唔辣嘅，飲得出新鮮蕃茄嘅味道，我覺得可以一試。另外酸菜湯底比較特別，應該係用雪菜做酸菜嘅，湯底偏酸，唔係好食得出雞湯嘅味道，呢度就有少少失色啦！至於配料方面我覺得都幾新鮮不過不失啦，最特別嘅反而係七彩麵，佢嘅麵質尚算幼滑，因為佢唔係好厚嘅關係，所以放喺熱湯上面就要快啲拎起上嚟食，食落去嘅感覺比米線更能食得到湯頭嘅鮮味，大家如果有機會去嘅話都可以試吓㗎！🇨🇳雲魅九龍旺角彌敦道724-726號 18樓🇨🇳大家記得留意同埋follow我嘅IG Channel:Danacaneat有任何最新資訊都會喺度update 㗎!歡迎接受任何試食試用邀請
