前文提要 相信、鼓勵、耐心等待 「佢哋咁細個係唔係真係得架？」即係咁，如果你唔俾佢試嘅話，就點都唔會得架啦。就算今次唔得，都係一個訓練，訓練小朋友自己解決問題。有好多家長會覺得唔應該晒時間，話俾佢知要做咩咪有多啲時間學其他嘢囉。但係其實學咩都好，都只不過係解決唔同嘅問題。學習語文係解決溝通同表達嘅問題、學習數學係解決生活上甚至製作動畫嘅問題、學樂器係解決用樂器去表達音樂嘅問題等。如果小朋友識得點樣自己解決問題，只要你令佢覺得呢個係佢想解決嘅問題，而唔係單單為咗成績表好睇，佢就會自動自覺去做你想佢做嘅嘢。再現實啲諗，出到嚟做嘢，有邊個老細會唔需要員工自己諗解決方法，直接捉埋員工隻手去做？實有嘅，不過通常老細都係想員工幫佢解決問題多囉。 解決問題嘅能力，每一個人都有。但係如果你唔相信小朋友做到，小朋友係會感覺到。當佢最信任嘅你到覺得佢做唔到，佢就會相信自己做唔到，繼而真係做唔到嘎啦！但係當你相信佢做到，但係你又唔話被佢知，佢就會覺得到唔係咩重要嘢，不如做啲自己中意做嘅嘢好過。所以，每一次佢唔記得、未達到標準或者氣餒嗰陣，你就要提多佢一次「唔緊要，你努力緊就得，你會做到，繼續嘗試就得嘎啦。」而唔係質疑佢有無盡力。 再者，俾著你都唔可以咩都一下就學識啦！俾多少少時間佢感受下個學習過程同自己嘅進步，唔好未點個熱情之火就淋濕晒人地啲柴先得㗎！如果你唔等佢就 take over 返所有嘢，你第日唔好怨佢「無耐性」、「急功近利」、「行捷徑」、「未學行，先學走」啦，因為係你教㗎。身教比言教更有影響力就唔使我講你都知啦係唔係呀！ 持續讚賞 呢個唔多講啦，學習階段，佢無生活負擔，佢唔怕俾人炒，所以小朋友做嘅嘢多數為咗開心同關注，如果佢覺得自己攞唔到正面關注，就會做啲嘢去攞負面關注。啫係你唔讚，佢咪博鬧囉。讚多啲啦，又唔會少忽肉嘅。 －－－完－－－
