前文提要 建議及討論 小朋友講完自己知道嘅嘢，大人唔多唔少都會有啲諗法。但係唔知係唔係大家被人鬧得多，周街都聽到好多錯誤示範。 錯誤示範一：「你梗係」系列。「你梗係溫唔夠書，所以緊張啦！」、「你梗係唔專心，所以唔夠時間啦啦！」等。 梗咩係啫！你又唔係佢，未卜先知咩？同未審先判一樣，知你叻，乜都識喇！但係有邊個會特登考試唔專心㗎？我淨係見過兩、三個學生咁做。而如果你小朋友係專登唔專心考試，通常都同大人有關。 錯誤示範二：表達抽象。「你勤力啲啦。」、「你小心啲啦。」等。 咪講咗囉！咩叫勤力，咩叫小心啫？我覺得自己好勤力、好小心啦喎。咁勤力啲同小心啲啫係要多幾多？咁點做先可以做到？ 錯誤示範三：「都叫咗你」系列。「都叫咗你寫快啲㗎啦！」、「都叫咗你串字㗎啦！」等。 馬後炮。我舊叫咗你要好似李嘉誠咁有錢啦！你又唔做？ 啫係咁，我話建議啫，唔係叫你么潤、鬧、吩咐、訓示。而係帶領佢哋去自己諗方法，再去試驗。係，我哋係大人，識嘢一定多過小朋友。但係如果你唔係啲小事上面俾佢哋試下去諗去試，點會有青出於藍嘅一日呢？況且，你都唔可以肯定，係同樣嘅引導提示下，佢諗嘅嘢唔比你更適合小朋友自己架喎。另外，如果經小朋友自己思考，佢會更有動力去實行。 你話講乜喇！ 第一步－正面評價小朋友嘅自省能力 「你知道有咩困難，做得好好，係進步嘅第一步。」 第二步－總結小朋友嘅發言 「照你頭先咁講，你嘅困難係······，係唔係？」 第三步－逐步引領小朋友尋找解決困難嘅方法 「你覺得邊一項困難需要最先解決？」 「呢個困難你諗唔諗到咩方法可以改善？」 「呢個方法，我哋要點做？第一步係咩嘢？」 第四步－如有需要，為小朋友提供優化建議（緊記尊重小朋友意願） 「你個方案好好。如果我哋喺實行嘅時候······，你覺得會好啲定係差啲？」 「你嘅方法應該可以幫到嘅。我有另一個諗法，你睇吓邊個會好啲？」 第五步－設定檢討日期 「非常好啊！我哋落實左一個詳細嘅方法，可以一步一步跟着做。不如我哋試一段時間，睇下呢個方法幫唔幫到你先啦。我哋不如一個星期之後睇下你有冇進步啦？」 －－－待續－－－
