前文提要 了解問題(issue) 留意返呀，問題唔係錯誤。有問題未必係佢嘅錯，呢個時間亦唔係搵人祭旗嘅時間，話邊個做錯係於事無補嘅。呢個時候係要睇下成件事係點，先可以知道係邊方面出現問題或者困難。我之前都提過，華人社會「點解你要咁做？」係管教者嘅口頭禪。其實「點解你會錯㗎？」都係佢同鄉喎。「你話要了解問題嘛。」如果咁樣問就可以了解問題，一切都變得簡單啦。你可以問孕婦「點解你咁耐都生唔出㗎？」醫生就唔使睇下究竟有咩狀況。你可以問病人「點解你會病㗎？」登革熱就可以好快咁及時處理。你可以問個火場「點解你會著火㗎？」然後消防同警方就唔需要調查。如果呢個問題係有用嘅，呢個世界就唔使專業人士，因為你問點解，對方就會知道問題所在。可惜呢個世界並唔係咁嘅。小朋友或者可以答你「我唔夠勤力。」或者「我唔小心。」但係佢咁答好大機會係佢知道呢啲答案係大人想要嘅。而當你以為了解咗問題，問佢點解決嘅時候，佢會答「以後勤力啲。」或者「以後小心啲。」咁就大功告成係唔係？錯！佢根本無答過嘢！咩叫勤力？咩叫小心？啲係幾多？無人知，你自己都未必知，因為你都唔知佢確實做咗啲咩。 解決方法：心平氣和地叫小朋友盡量憶述溫書同考試嘅情況同心情。必要時用問題引導佢講多啲嘢。 係呀！仍然係心平氣和呀！如果你一副問責相咁同人講嘢，人哋梗係死都講啲你啱聽嘅嘢啦。同埋係盡量㗎咋。如果佢可以100%話俾你知發生咩事，你可以帶佢去馬戲團表演啦。 你可以問：「溫書個陣點溫㗎？考試用幾多時間做呀？」呢類型問題可以幫你了解一啲實際情況。你又可以問：「你覺得失分係因為唔夠時間做、未睇清楚題目、未溫到、唔記得、無double check定係其他原因呀？」呢啲問題，有部分可以知道佢自己嘅觀點，有部分可以知道可觀察嘅情況，有部分係俾佢知道實際應該要做啲咩去變得「小心啲」。 讚賞付出(effort) 人有通病，就係知道有咩問題就講咗問題先。人有通病，就係俾人話完就咩到聽唔入耳。我哋無可能去改變人哋點接收，所以唯有改變自己點交流。 解決方法：讚咗先講！ 你可能話「點讚得落呀？」咁樣係因為我哋好少俾人讚，所以覺得要做得好好先讚得。但事實並非如此。當人被讚後，都會開心。->人係會做啲令自己開心嘅嘢。->人會做啲會被人讚嘅嘢。換言之，所有你想佢繼續做嘅嘢都要讚，直到佢內化咗為止。例如，「我見到你有花時間去溫習。」、「你未識嘅呢題，你有嘗試去填答案。」、「扣咗分呢度，你可以話返被我知個答案係咩。」然後再加一句「我欣賞你嘅努力。」其實讚人，都唔係咁難啫！ ---（待續）---
