有一日，絲歪同我講：「我阿媽『差輪廚』(challenge)我。佢問如果我未來子女好似我細個咁粗心大意，錯埋晒啲無謂嘢，我會點教喎。至少我唔會問佢點解錯先！無人想做錯，佢知點解就唔會錯！然後鼓勵佢俾心機，同佢一齊嘗試解決問題。例如問下佢諗唔諗到有咩辦法，教佢要對答案咁。」（由於我哋用英文溝通，同埋係由對話抽出嚟，所以翻譯完可能唔係太流暢。）我有時真係覺得，絲歪唔投身教育界真係嘥晒。人各有志，有啲嘢無得強求嘅。 言歸正傳，如小朋友「錯埋晒啲無謂嘢」，應該要點教呢？舉個例，假如小朋友學校派卷，你發現佢有好多「唔應該錯」嘅「無謂嘢」被人扣分，應該點做？ 摒棄前設(presumption) 首先，你要知道「唔應該錯」同埋「無謂嘢」係你嘅定義，你嘅前置設定。點解呢啲係唔應該錯呢？因為你唔會錯？因為佢本身識？定係因為無嘢係應該錯？同樣嘅問題可以套落「無謂嘢」度。無謂因為你唔會錯？因為佢本身識？定係因為錯就係無謂？呢啲定義先係最無謂嘅，而且通常都係錯嘅。小朋友唔錯都錯咗啦，施主何必執著應唔應該，無唔無謂呢？如果你同個小朋友講「錯埋晒啲唔應該錯嘅無謂嘢。」小朋友聽到嘅係「我唔應該，我無謂。」打擊完佢，又幫唔到件事，何苦呢？ 解決辦法：唔好用形容詞，以平心靜氣嘅態度，指出佢係試卷入面係有未做啱嘅地方，可能嘅話叫佢話返俾你知係邊啲位。 無錯！唔係錯！唔係唔啱！係未做啱！點解要一份卷、一個分數去決定你個小朋友係咪錯呢？當你同佢講，佢只不過係未做啱嘅話，佢就會收到你覺得佢係做得到，呢個只不過係「做到」之前嘅轉車站。除咗令小朋友學識「失敗乃成功之母」，學識接受自己唔會所有時間都係絕對正確同面對未做到嘅嘢外，用可以鼓勵進步。而你只不過係陳述事實，唔係責怪，如果之後要教任何嘢，小朋友都唔會驚到咩到入唔到耳。 －－－（待續）－－－
