木頭車、公雞碗、豬紅蘿蔔牛腩...一提起啲回憶就湧晒出嚟。點解車仔麵又叫「嗱喳麵」？以前車仔麵...大多藏身街頭巷尾，靈活多變，一撮油麵、十幾廿款餸任意挑選、再加兩殼熱湯、淋匙辣汁，咁就為之一碗。當時賣車仔麵嘅環境都唔多乾淨，所以被稱為「嗱喳麵」，至於點解叫「車仔麵」？就係以前小販以木頭手推車喺街頭賣麵。而家為咗迎合香港人多變嘅口味，款式過於著重創意，好似炸雲吞、酸齋、鯪魚肉、燻雞翼等，雖然滿足到食客口味，但就失去咗原有車仔麵嘅風味。記得細細個成日去一間由士多起家嘅車仔麵小店，店入面發黃嘅牆身、銀色筷子筒，有人會覺得懷舊、有人會覺得邋遢，而我就反而覺得係麵店嘅特色。當時麵店自家製滷水雞翼最熱賣，滷水汁香味出眾，餸料好似雞翼尖、豆腐、大腸都香得好有層次，而豬紅、蘿蔔、豬皮亦係必食之選。不過因為店入面環境較細，嚟食嘅食客都要排隊，落單、攞麵等。而嗰時並冇特定嘅麵種，只係憑個人喜好自由搭配，以前啲麵條淨係得幼麵、粗麵、米粉等，而家就多咗河粉、公仔麵、烏冬同米線，款式五花八門。此外，湯汁亦由清湯、腩汁等進化至去咖喱汁、麻辣醬甚至乾撈，食法變得多樣化。隨住時代變遷，車仔麵已冇木頭車，亦唔再喺街頭巷尾叫賣，取而代之，唔少車仔麵已轉型到店舖經營，但反而失去咗原有風味。今次就同大家分享一下兩款經典車仔麵餸嘅做法，等你哋喺屋企都可以回味下呢款特色美食。 唔知你哋食車仔麵嘅時候最鍾意配啲咩餸菜呢？點擊圖片放大 鹵水牛肚雞翼尖做法1. 先將金錢肚及雞翼尖，用少許白醋及酒汆水，備用。2. 電飯煲內加入薑葱，再放入金錢肚及雞翼尖。3. 將滷水料加入電飯煲內，按「開始」按鈕。4. 當完成第一次烹煮模式後，將雞翼尖取出。5. 關蓋，將金錢肚焗30分鐘。6. 再按「開始」按鈕，進行第二次烹煮模式。7. 完成後，不要開蓋，再焗30分鐘即可。溫馨提示:- 可按個人口味加入花椒一同滷煮。- 可按個人口味加入不同食材一併滷煮。- 用電飯煲滷煮食材，火力較均勻。
