身為低收入族群，無錢去長途旅行，唯有近近地去內地兩日一夜團過下旅遊癮。不過原來近年除咗遊山玩水，美食之旅之外，仲有一個叫做「睇樓團」。 ▼香港樓難買就係人都知，俾個首期閒閒地都要幾十萬。不過如果你手持幾十萬，係內地分分鐘就可以買到一個800呎嘅單位啦。今次就跟屋企人體驗「睇樓一日遊」，即刻同大家分享一下。 當日一早九點去到九龍塘地鐵站集合，之後一行人坐大巴向碧桂園出發。團入面每人都各有目的，有睇樓，有收樓，有睇裝修，大約二十人。 由香港到碧桂園範圍大約兩個鐘，十一點幾一到埗，我地先去「鳳凰軒中餐廳」食午飯。 ▼團費＄150已包含午餐及來回車費。八餸一湯，白飯任裝。係低團費，無期望嘅情況下，食物味道已相當不俗。只係稍嫌餐廳入面有一陣奇怪嘅味道。 中伏位：女侍應親切地拎左一堆罐裝飲品俾大家選擇，好多團友（包括我）都以為係包餐一部分，結果好多人開始飲嘅時侯佢先話要＄25蚊一罐。估唔到酒店入面嘅餐廳都會咁樣「老屈」。雖有可能係個別例子，但仍提醒大家先問清問楚。 ▼午飯後，每組會有一個地產經紀帶你睇示範單位。整個碧桂園範圍好大，而且連住一個大沙灘。 ▼單位呎吋由五百幾呎到二千幾呎都有。雖有窗台，但全屋間隔四四方方，非常實用。好似一個800呎嘅單位，只係賣60幾萬人民幣。 ▼真正出售嘅單位唔包傢私，但全屋已包基本裝修，好似洗手間咁，一入住就如圖一樣。 ▼整個屋苑分好多期，而且仍在擴建當中，證明長起長賣。 當係屋苑入面遊走嘅時侯，係咁靚嘅環境下，都有一剎那覺得係大陸買樓都好似唔錯呀…不過呢個念頭係我去完廁所之後就馬上打消。因為當你比無數人打尖後，就會發現要融入內地文化，對我地土生土長嘅香港人黎講可謂近乎無可能。 香港地買樓就係…這麼近…那麼遠… 【 Facebook專頁】 當Cony遇上Brown 【Instagram 】 cony_luv_brown
