我喜歡Eman像一本心靈書籍，他的見解比較獨特，我無需要考究內容的真偽，只知道每次傾談之後，我都有著重新出發的動力！所以我喜歡聽他說的故事，很有意思！

我：「我覺得自己係個臉皮特別薄，又非常敏感嘅人！我冇辦法忍受人地對我提出嘅任何批評！就算係好簡單嘅一句，我都會全日唔開心！重點係，我一唔開心，果日就會事事都唔順利！我嘅情緒就會更加緊張，搞到乜野都做唔到！最後，都會係以淚洗臉去結束好黑仔嘅一日！我真係希望自己可以有一層好厚嘅保護膜，可以完全唔受外界影響！」

Eman：「你點知道自己有冇一層厚厚嘅保護膜呢？假設你真係有，又會有乜野唔同？」

我：「如果真係有，咁我咪唔怕受傷囉！好似有個貼身保鏢一樣！我有足夠嘅防禦能力，就可以堅強啲！令自己刀槍不入，隨時保持最佳狀態！」

Eman：「其實我地每個人嘅內心深處都有一塊敏感而又脆弱嘅地方，但果個地方同時又係我地最寶貴仲係最有創造力嘅地方！就好似小朋友咁非常容易受人影響或者受到傷害。喺我地面對呢個大人嘅世界果陣，就係呢個靈魂，需要強而有力嘅守護神去保障佢嘅安全。」

我：「我成日都覺得自己有好多缺點，犯過太多錯，根本就一文不值！」

Eman：「妳要時刻記住自己係個珍貴無比，獨一無二嘅Baby！妳有一顆善良嘅心，好似珍珠一樣無價！無論之前犯過乜野錯，都唔會改變呢個事實！冇任何力量可以削減你嘅價值。因為如果一個人覺得自己冇用，咁就表示佢準備好接受人地無理嘅對待、欺騙、甚至糟蹋。」

聽到這裡，不知怎的眼淚會失控地流下，或許是活了那麼久，從來沒有人這樣子安慰過我，還要是個只是有點熟悉的陌生人。想想也是，我知道自己的表達能力好，但每當我面對某些人與事時，總是表現得軟弱無力、毫無氣勢！這就是對自己沒有自信的「心虛」表現嗎？

Eman：「如果你想改變，首先要停止懷疑自己！停止所有貶低自己嘅行為同想法！」

我：「咁即係點呀？我要點做先可以停止睇唔起自己呀？」

Eman：「通常都係由朝早起身對住塊鏡果陣開始嘅！我又唔信你會每朝起身好開心咁同自己打招呼囉！等我估下先⋯⋯你應該會覺得自己好樣衰、身材唔好、太肥！仲要係唔只朝早咁諗，全日耳邊都會迴響住：我一定做唔到啦～我天生就係失敗啦～我根本唔值得人地對我好啦～我冇權要求更好嘅對待啦⋯⋯唔使多，只要少少劑量，以上任何一種想法嘅毒素就足以令你冇曬自信！就算點樣努力去扮，呢種由心底對自己產生嘅懷疑，就會不斷向外擴散，每個同你交流嘅人都會無形中感受到你嘅不安同心虛！對手好容易就可以KO你！」

我看著面前這個男子，年齡跟我相若，為什麼他能夠活得那麼自在，那麼自信，那麼了解我呢？真的因為他看的書籍比我多很多的關係嗎？

我：「你越講我就越驚！大師，咁有冇方法搞搞佢呢？」

Eman：「咁你又唔使太緊張！其實我地每個人嘅個性當中都會存在！教你一個好簡單嘅方法：先好好認識呢個內在力量，再去設法控制佢！我地可以叫佢做 “內在批評師”！你唔需要在意佢到底係男定女，呢把聲一日到黑喺你耳邊講啲乜先係最重要！佢隨時會出現，但我地又好難察覺佢嘅存在！」

我：「咁我點去分果啲想法係 “內在批評師” 講定係我自己講架？」

Eman：「留意下當一個想法出現之後嘅感覺！例如你照鏡見到自己有個小肚腩，如果你諗都冇諗就好自然地出街，咁就冇野啦～但如果你開始懷疑自己係咪應該節食，甚至覺得應該即刻去抽脂，咁就代表 “內在批評師” 同你講緊野啦！你要記住佢只係你個性入面嘅一部分！你要做自己嘅最後話事人！」

我：「係呀！就係呢種強烈批判嘅想法成日搞到我情緒低落！以後我會提高警覺留意多啲！喺我日常生活邊啲想法成日出現！訓覺之前佢一定會黎！唔怪得我成日失眠啦！朝早又唔捨得起身！做乜野都冇心機！每次我有啲積極嘅IDEA，佢都會話 “我已經太老啦！唔適合做呢啲野！” 憎死佢！！！」

Eman：「咁佢又唔係你諗得咁奸嘅！雖然佢講野尖酸刻薄，但佢嘅意圖都係想第一時間叫你注意到自己有咩唔掂！等你可以喺人地面前表現得好啲啫～佢最大嘅憂慮係怕你會有一日被社會遺棄，冇辦法一個人生存落去！」

我：「哈哈～講到佢好似我阿媽咁！」

Eman：「"內在批評師” 嘅誕生都係童年時，因為每個小朋友天生就知道冇大人嘅照顧係生存唔到，所以會學適應父母、學校。過程中所有大人嘅提醒都會納為己有，難怪有啲 “內在批評師”講野嘅語氣會好似自己媽咪咁煩，或者爸爸嘅命令咁冷酷！」

我在想自己的“內在批評師” 語氣像誰⋯⋯ 但可以肯定，他會訂下一個超高的標準，如果我未能達成，他會繼續攻擊；如果我成功，他會把標準往上提高！

（待續）

成功發佈