2017年已經四個月喇，寶貝女嘅第一個挑戰就係"陪媽咪番工" 懷住對媽咪公司嘅好奇心，寶貝女一月一號一齊番去陪媽咪加班。其實成日流流長，我都好擔心，始終小朋友耐性有限，又怕佢搞住我做嘢，所以我事先都準備咗好多嘢俾佢做: 假期功課啦～ 好多本電子書嘅kindle啦～ 畫板啦～ Smarty pants啦～ 媽咪安排咗一個屬於佢自己嘅位置之後，就帶佢行吓office，睇吓pantry，睇吓我坐嘅位，跟住佢就做自己嘢，直到食埋lunch，大半晝時間都好乖好斯文，有時走嚟痴住我一陣，見我忙都自己番埋位睇吓書。 見佢咁乖，我終於忍唔住要拎份神秘禮物出嚟喇，當然不忘要俾一個擁抱，稱讚佢今日嘅表現: ☀"你今日好乖喎，自己安靜用心做功課，做完就自己玩同睇書，表現得好獨立同大個女，令媽咪可以安心做嘢，我真係覺得帶你番工呢個決定係冇錯架!"☀ 如果淨係讚"好乖"，小朋友未必知道自己乖啲乜，所以我習慣咗具體啲講我欣賞佢啲咩行為，呢種行為有咩好處，帶俾媽咪咩感受，咁小朋友慢慢就會知道，邊啲行為係應該做，仲會帶俾其他人都有好處架。 寶貝女聽完我讚佢，表現出一副好得戚嘅樣，我深信，呢種讚賞嘅方法，對小朋友真係好work Btw，9點開始番工，7點3先走，呢個挑戰真係唔簡單 希晴媽媽與寶貝女 ♥§facebook§♥
