要小朋友鐘意一樣嘢，其實潛移默化真係好有效，好似寶貝女咁，佢一出世媽咪就買咗隻bear bear公仔俾佢攬住瞓，一直攬到而家，仲咩都鐘意熊仔添，連佢個同學仔嘅媽咪都係咁講架，哥哥就俾熊仔，妹妹細個就俾兔仔，大個就一定唔會爭嘢玩啦！ 同樣道理，爸爸同我都覺得，想培養小朋友對某樣嘢嘅興趣，應該先營造一吓氣氛，所以，想寶貝女學彈鋼琴？lee個波梗係踢俾我啦，冇法，邊個叫我老豆有咁長遠嘅眼光，細細個就叫我去學琴呢！ 首先，係工具！ 而家嘅鋼琴，吓吓都萬幾兩萬，所以，數碼鋼琴係必然之選。有位鋼琴老師話，用數碼鋼琴練習係冇問題架，只係音色差啲，所以我哋好放心揀嘞！爸爸話，佢結婚之後，曾經應承過我要買部白色嘅鋼琴俾我，而家係時候找數喎！我心諗，你都係因為個女先買啫！搵笨！ 數碼鋼琴買咩牌子好？而家市場主要嘅牌子有Yamaha、Korg同Casio，我試過Korg，啲琴鍵幾好彈，但係啲聲一聽就覺得係喇叭出嘅聲咁，好冇說服力，而Yamaha音色唔錯，但係硬係覺得佢啲function做得好唔方便，始㚵Yamaha係做音樂嘅，做鋼琴真係唔錯，但係數碼嘅嘢，都係揀番Casio啦！ 買數碼琴嘅好處，唔單止慳位，仲可以連headphone，方便我夜晚練琴，鼓勵我多啲練習，唔錯架！但係原來ipad都好重要架喎，download晒啲琴譜放喺ipad度，真係超方便呀！ 咁軟件呢？ 所謂嘅軟件，就係媽咪嘅努力囉！得閒就喺寶貝女面前彈吓琴，表演吓，為咗個女，我連gel甲都拆埋，好有決心架！寶貝女好鐘意唱歌，除咗有本英文兒歌琴譜之外，媽咪仲專登download咗let it go、a whole new world等等，實行邊彈邊唱，搞好個音樂氣氛！ 媽咪希望可以自己教寶貝女一啲基本嘅樂理同睇譜等等，要持之以恆地教，都係要好似出去上堂咁，安排好個時間先容易執行，如果唔係，好容易就會冇咗件事架喇！ 十月入面去咗咁多個活動，玩咗咁多嘢，雖然好開心、好精彩，但係嗰啲活動始終只係一次性，又點夠我哋又彈又唱，培養學鋼琴的氣氛同興趣咁開心呢？我同寶貝女已經上咗第一次堂喇，佢嘅耐性足夠維持到25分鐘，仲自己走去練琴添呀！我覺得我哋嘅計劃，已經算成功咗一半架喇！
