哈哈！精彩十月，又點少得媽咪嗰份呢？ 之前嘅日誌都講過，搞會員活動係我嘅工作之一，上次搞嘅品茶活動，真係好成功架（睇番lee度啦 -> 陪唔到寶貝女嘅星期六），所有來賓都100%滿意，我同我team同事勁有滿足感，但係下次又搞咩主題好呢？ 四出搜尋之後，我哋搵到lee間叫Glass Farm，教做手作玻璃盆景，喺facebook成日都見到朋友去玩，今次為咗公司搞個成功嘅活動，我決定去試堂！ 一入去就見到成張枱都係工具同材料，好整齊喎！但係，係咩黎架？ 轉身一望，就見到牆上面有好多唔同材料嘅介紹喇，既詳盡又美觀，讚！ 年輕有為嘅導師Bill逐步為我哋講解每種材料嘅用途同特點，又講吓製作玻璃盆景嘅理論同技巧，仲叫大家花少少時間構思一下個盆景嘅設計。 唔好睇個樣好似好簡單，其實中間要處理嘅嘢非常之多，先要放一啲小石頭，再噴濕啲水苔再放落去壓實 之後再處理 主角「青苔」，又要清理、修剪，務求令到嗰舊青苔合符你嘅盆景設計，再放一啲小石頭、小屋、動物、有色永生青苔等等，佈置一吓。Lee個時候，我當然係搞到成手都係嘢，仲點影相？只可以睇成品咋！我啲同學仔，有心思過我好多，喺度分享埋佢哋嘅作品先！ Lee類型嘅workshop需時大概一個半至兩個鐘，睇你選擇嘅玻璃樽大細同設計嘅難度啦，一堂包基本材料就$300一位，換過大啲嘅樽，或者加特別嘅figure就再加錢，收費都合理呀！ 上完lee堂之後，我覺得都好適合做親子活動，問過負責人，佢哋都歡迎家長帶埋小朋友一齊參加架！睇黎我同寶貝女好快又可以有多樣嘢玩lu！ Glass Farm FB: https://www.facebook.com/glassfarmhk WEB: http://www.glassfarm.hk/
