可能寶貝女係獨生女啦，我lee個媽咪寧舍珍惜佢同其他小朋友玩嘅機會，所以媽咪一定會抽時間去學校活動，適逢每年秋天嘅學校旅行，當然唔少得我哋啦！ 今年，學校安排咗去保良局大棠渡假村，再喺渡假村入面安排啲集體活動俾小朋友，當我睇到學校通告有lee個安排之後，心諗：「吓？唔係掛？冇咩特別咋喎？營地集體活動，咁去邊度玩又有咩所謂呢？」 所以，如我所料，最尾都係玩啲好簡單嘅遊戲： 例如：就算N班嘅小朋友都唔會覺得困難嘅平衡木啦 爬水管（媽咪唔係好明箇中嘅原因或者道理） 同埋喺室內運動場，跑黎跑去、爬黎爬去嘅集體遊戲 寶貝女最鐘意嘅，就係佢平時冇得玩嘅跳彈床喇！ 但係成個旅行，最開心係咩時候呢？竟然係午餐之後嘅自由活動時間，因為佢哋去咗飯堂附近嘅公園仔玩囉！（咁同喺屋企樓下嘅公園玩有咩分別呀？） 其實，去邊真係冇咩所謂，眼見住寶貝女同佢嘅同學仔玩得咁開心，一齊學習相處、禮讓，媽咪好感恩，快樂嘅童年唔係應該咁簡單嘅咩？
