早幾日一番到屋企，工人姐姐話寶貝女又跌親！哈哈！狠心嘅媽媽，聽到若無其事，簡單講咗一句：痛唔痛呀？冇事就得啦！講真，你估唔心痛嘅咩，好彩唔嚴重，如果喺白滑嘅腳上面，膝頭有疤痕就大鑊！但係為咗佢唔好當lee件係咩大事，堅強啲勇敢啲，唔好隨便扭計撒嬌，媽咪做戲都要做全套架！ 之後，佢好緊張咁同問我：「媽咪呀，投先有啲大哥哥周圍走撞到我呀，但係點解佢冇講對唔住架？」（好似好小器咁．．．） 媽咪由寶貝女嘅感受出發，希望佢明白，如果自己做錯事但係冇道歉，人哋嘅感受就會好似而家自己咁，覺得唔係好開心囉。不過我都希望寶貝女唔好咁介意，寬宏大量一啲，人哋唔講都唔緊要，可能唔記得啫！ 琴晚佢又問我：「點解個傷口嘅皮硬咗嘅？」 哈哈！媽咪又用士兵嗰套黎回應佢（寶貝女之前病同食藥都係用lee套架，可以睇lee篇「用小朋友容易明白嘅語言」）： 你身體嘅士兵做緊嘢架喇，佢哋喺你個身體度走走走．．．（配合手指走動嘅動作）走到你個傷口嗰度，因為你嘅皮膚未好番，所以佢哋就整啲硬嘅「焦」出黎遮住佢，到皮膚好番嘅時候，士兵就會幫你踢啲焦落黎架喇！所以呢，而家最緊要你食多啲有營養嘅嘢，等士兵多啲力氣，快啲幫你整好個傷口呀！ 做媽媽嘅，真係要創意無限，講得佢明又要佢學到嘢喎，唔容易架！不過四、五歲嘅小朋友真係好多嘢問呀，媽咪有時都招架唔住！ 好記得有一次，我叫寶貝女去完厠所閂埋個蓋先沖水，佢問點解； 我話：「媽咪唔記得咗點解添，下次講俾你聽啦！」 個衰女話：「媽咪你讀多啲書呀嘛！」 寸到呢！不過，都係第一次俾人寸得咁開心！哈哈．．．．
