寶貝女十月，真係太多嘢玩喇！ 上星期六，媽咪就帶寶貝女去咗「幼兒愛音樂Good Music for Kids」lee個小交響樂團嘅音樂會，俾寶貝女認識吓古典音樂。 我向來都好支持小交響樂團嘅音樂會架，好鐘意佢哋嘅主題好生活化，令到我lee啲對古典音樂認識唔深嘅人，可以透過生活化嘅題材，接觸同認識多啲。其實上年，香港小交響樂團已經搞咗個「寶寶愛音樂Good Music for Babies」，適合一啲0至2歲嘅小朋友，內容好生動，仲教嗲哋媽咪點同bb跟住音樂，郁吓手仔腳仔。上次搞得咁好，今次梗係又要去聽吓啦！ 今次嘅「幼兒愛音樂」，以古典音樂A to Z黎做主題，適合3-6歲嘅小朋友，教佢哋一啲古典音樂嘅知識，所以門口同場地，都有好多英文字母嘅設計架！ 媽咪爸爸都學咗好多嘢呀，睇吓我而家仲記得幾多先： A – A係樂團tune音嘅note B – BACH 著名古典音樂作曲家 C – CONDUCTOR 樂團指揮 D – DUET二人合奏 F – FLUTE G – GLOCKENSPIEL J – JAZZ L – LEGATO M – MOZART S – STACCATO T – TRUMPET V – VOICE 我都算幾留心架喇，其實內容都有啲難，可能6、7歲會更加適合，所以表演途中都有啲小朋友唔夠耐性，又喊又亂叫咁。寶貝女都ok啦，媽咪喺旁邊一路解釋就好少少囉。最開心嘅，就係lee個concert用sleeping beauty嘅waltz黎做結尾，啱晒寶貝女公主啦！ 唔知A to Z入面，寶貝女又記得或者明白幾多呢？不過我好肯定，佢一定記得LEGATO同STACCATO，因為佢番屋企又問番我，懶叻咁！ 其實香港小交響樂團喺聖誕節有個家麥兜．感人至深小聖誕〔窩心版〕，媽咪都好有興趣去睇架，可惜只適合6歲以上嘅觀眾，寶貝女仲未夠稱，唯有繼續留意佢有冇新節目啦！ 香港小交響樂團 https://hksl.org/hk/
