透過朋友好介紹，知道Watoto兒童合唱團喺香港舉辦咗一個巡迴演出，為lee個慈善團體宣傳，同時籌款，引起世界對非洲小朋友嘅關注。 媽咪準時收工，我哋坐定定準備聽歌喇！ 其實，香港嘅小朋友真係好幸福，要乜有乜，究竟我哋做媽咪嘅點樣先可以表達到lee個信息俾我哋嘅小朋友聽呢？今次lee個真係一個好好嘅機會，唔單止有非洲嘅小朋友唱歌，佢哋仲會分享自己嘅經歷，同得到Watoto嘅協助之後嘅改變等等。 舞台設計好簡單，但係好有非洲特式；合唱團一邊唱英文唱歌，後面嘅熒幕一邊會播出一啲圖片同歌詞嘅中文解釋，夠晒細心周到；除咗有傳統嘅非洲特式服裝同舞蹈之外，佢哋仲設計咗啲比較現代嘅音樂同服飾，小朋友都聽得好投入架。 Watoto本身係一個基督教團體，所以歌曲嘅內容，都係圍繞讚美神lee類型嘅主題，配合唔同嘅旋律，帶出咗小朋友雖然有不幸嘅遭遇，但係仍然有感恩嘅心，我哋聽到都好感動呀！ 合唱團有幾位小朋友一邊講佢哋嘅見證，我一邊解釋俾寶貝女聽，原來因為非洲嘅愛滋病問題，令到好多小朋友好細個就冇咗父母嘅照顧，最尾需要流落街頭，或者由患病嘅祖父母照顧；而且，醫療人員不足，令到好多輕微嘅病患得唔到醫治，好容易就變得嚴重而失去性命。聽到咁多小朋友嘅分享，寶貝女都好唔開心，不斷咁問媽咪點解，媽咪冇直接回答，只係問吓佢我哋可以為lee啲小朋友做啲咩呢？寶貝女話想我哋捐多啲錢，仲同意喺佢個老虎仔錢罌度攞錢出黎添呀！ 音樂會結束後，大會安排咗一啲有份表演嘅小朋友喺台前同觀眾影相留念，寶貝女好興奮，話一定要去，因佢覺得非洲嘅小朋友好靚、好可愛。媽咪好開心，至少寶貝女冇種族嘅問題，不過見到有啲小朋友笑得少少勉強，都知道佢哋場場表演之後都俾人當佈景板拉住影相，冇法啦，幫Watoto宣傳先幫到其他小朋友架嘛，所以除咗捐錢之外，我哋仲同小朋友擁抱，講咗句「Good job! Jesus loves you!」希望佢哋感受到我哋嘅真心支持啦！ Lee個巡迴音樂會一直去到11月9號架，就算冇宗教信仰都好值得睇，仲有少量免費門票，快啲上網申請同download喇！ Watoto兒童合唱團亞洲巡迴音樂會2014香港站 http://ticket.watoto.asia/ticket-booking/ticket-booking-index-zh.php
