我好錫我個寶貝女，佢做錯嘢嘅時候，總會好聲好氣同佢講道理，但係當佢明知故犯嘅時候，當然都會罰。 專家教，罰都要罰得有關係，最好係因為佢做錯嘅事而導致嘅後果，又係時候要媽咪動動腦筋。 上星期寶貝女如常著住條裙仔出街，唔知做咩突然間乸起條裙，俾人睇晒條底褲仔，媽咪即刻火嚟，當然冇發出黎啦，我㩒住我啲脾氣嘅時候諗：「佢咁鐘意著裙，唔俾佢著會點？」所以我就話：「再拎起裙仔就一個禮拜冇得著裙架喇！」 點知唔夠半個鐘，事件又重演，好！媽咪講得出，做得到：「既然唔識著裙嘅儀態，只好著褲啦！」番屋企即刻換番條褲，直至下星期日先可以著裙。 我有一刻衝動，好想話：「你再係咁就dum晒你啲裙架喇！」 不過，意氣說話唔講得，明知講咗唔會做嘅，就千祈唔好講，免得日後小朋友知道你只係「大」佢，到時真係講咩都冇用。所以，話咗罰，就要罰，即時執行，再同工人姐姐好好溝通，確保媽咪唔喺屋企嘅時候都持續執行。 點知，星期三晚，我一放工番屋企，寶貝女就同我講：「我今日著咗裙呀！」一問之下，原來係婆婆嚟探寶貝女嘅時候，寶貝女扭多兩扭，婆婆就話算啦算啦。唔知點解，我異常平靜，我同寶貝女講：「首先，我覺得你老實同媽咪講，咁樣做好啱，但係對一個禮拜唔著裙lee個懲罰你做唔到，媽咪好失望，因為你冇守到承諾，所以唔著裙嘅日子要加多日到星期一先可以著番。」扁晒咀嘅寶貝女知道扭都冇用，媽咪喺lee啲事情上面向來好堅持，只好就範。 教好小朋友，除咗方法之外，一家人合作真係好重要。下次我一定會同爸爸、婆婆、姐姐都講清楚，小小懲罰，唔好心軟，因為，一齊教好個寶貝女係我嘅首要目標。 lee個小朋友真係太古惑，唔俾佢著裙，都要揀條似裙嘅褲黎著，遲早激死我！
