4歲～仲係一個搜尋興趣嘅階段，爸爸媽媽會用不同嘅方法，了解小朋友嘅興趣同天份，然後慢慢培養。周遊列國當然係好，但係都唔係個個屋企都負擔到，而我就最鐘意利用政府資源，除咗去公共圖書館參加兒童故事時間之外（之前嘅日誌都提過架，喺lee度），另一個好值得去嘅地方，就係香港各大博物館喇！ 上個星期六，我哋選擇去「菠蘿包」香港太空館。 其實幾得意，咁細個人仔點會知太空係咩？寶貝女第一次接觸solar system，係因為一本書叫「Marley: The dog who ate my homework」。主角Cassie嘅功課，就係要做一個solar system，由於寶貝女一讀lee本書就問我係咩黎，媽咪梗係要帶佢認識一吓啦！ 大空館唔算好大，其實我覺得唔算好適合咁細個去睇，始終好多理論性嘅嘢咁細個未必明，而且好多體驗嘅遊戲都要高過1.5米先玩得！不過，好多嘢對寶貝女嚟講都好新奇，媽咪嗲哋多啲用佢明白嘅說話解釋，佢都好有興趣睇（不斷專心陪住佢睇，真係冇時間影相架），好似： 太空科學展覽廳嘅太空站展覽區，講太空倉內嘅事寶貝女最鐘意，好似太空人食咩、點樣洗手、瞓覺等等，佢發現同我哋平時唔同就覺得好得意。 另外，當然要睇一睇天文展覽廳嘅太陽系模型啦，當我哋見到地球圍住個太陽轉同時又自轉嘅時候，為怕寶貝女唔明，媽咪叫寶貝女扮太陽，媽咪扮地球，親身示範咗一次地球點轉．．．．．（好難想像，唔知其他人見到會唔會嚇親） 既然成日都去唔同嘅博物館，寶貝女4歲之後又要收入場費，順理成章地我哋就申請咗博物館通行證（MUSEUM PASS）嘅家庭通，一年200蚊嘅年費，一家四口七個博物館任去，各間博物館又不時會轉主題，所以一年真係可以去好多次架，星期三免費開放去唔到嘅在職媽媽黎講，MUSEUM PASS真係算幾抵架！ 博物館通行證 http://www.museums.gov.hk/zh_TW/web/portal/museum-pass.html
