如果唔能夠瞓到自然醒，未瞓夠就要起身嘅話，大人都會忟，更何況係小朋友呢？我以前叫寶貝女起身番學，佢唔願起身時我又忟，佢趕番學我又趕番工，搞到成日朝早都嬲爆爆；一朝早冇好嘅心情，硬係覺得嗰日都冇咁順利。 專家分享咗一個開心叫小朋友起身嘅好方法，我決定要試吓： 首先，要準備一個，或者一班寶貝女嘅好朋友 由於寶貝女自細都好girlish，所以勁鐘意玩公仔，圖片入面嘅公仔只係佔少部份；右圖嘅馬仔，係媽咪去哈爾濱出差嘅時候買番黎嘅禮物，lee排馬仔好得寵架！ 寶貝女唔肯起身嘅時候，媽咪會拎起隻馬仔扮馬仔講嘢：「小朋友，馬仔黎叫你起身喇，要唔要一齊食早餐呀？」再唔起身，就搵馬仔去錫下佢嘅面仔，搞吓佢肚仔同手手腳腳。 好奇怪，lee個咁簡單嘅方法真係萬試萬靈，不過媽咪就成日要扮聲同做戲，真係少啲創意、少啲耐性都搞唔掂呀！ 琴晚搵番之前喺海洋公園買嘅企鵝出黎，我今朝拎住隻企鵝，扮晒喺房門口偷望佢：「早晨呀Courtney，你知唔知我係邊個呀？」寶貝女展出佢甜蜜又燦爛嘅笑容，回應咗一句：「你係Penguin！」我知道，今日我哋又有一個好嘅開始喇！
