琴日收工，喺地鐡月台等車嗰陣，月台幕門上有我身後一對母女嘅倒影，媽媽拎住手提電話㩒緊，六歲左右嘅囡囡喺旁邊掹住媽咪嘅裙腳，苦苦哀求緊，過咗一陣，個媽咪就開始鬧：「……你又係咁，整爛晒啲嘢，你要我教你幾多次呀？……」lee個媽咪一邊鬧，視線都冇離開過個手提電話，個妹妹都冇出聲，一味喺度飲泣咁嘅聲。車到喇，佢哋冇一齊上車，我心入面留住咗一絲嘅難過。 見到lee種情況，我再一次提醒自己之前為教女所訂立嘅原則： 一定唔當街鬧 小朋友同大人一樣，都需要自尊心，而保護小朋友嘅自尊心，對佢日後嘅成長同自信嘅建立都好重要，如果有需要喺街度鬧，最好行埋一邊，我會確保寶貝女係專注地望緊我，唔會俾其他嘢影響到。記得自己都寫過一次自尊心事件，喺呢度。 媽咪都要專心 我時刻提醒自己，如果要寶貝女覺得嗰件事好重要，我會痞低望住佢黎講，大家同一個視線水平，唔搞其他野，表示尊重同認真。 忍住脾氣 成日都睇到啲article話父母發晒脾氣地指摘小朋友嘅話，小朋友只會記得父母嘅態度，未必記得父母想教佢嘅信息。Lee樣嘢，我真心相信，因為到而家我都仲記得當年我老豆鬧我嘅語氣，但係鬧咩我真係唔記得lu。 以前嘅事，講就講得實在啲 都係睇育兒書學嘅，就係唔好講「你又係咁」、「你成日都係咁」類似lee啲說話，唔實在，小朋友未必記得。我會同寶貝女講：「記唔記得上次點解媽咪唔俾睇電視？因為早餐冇乖乖地食，浪費晒啲時間；點解你今朝又係咁，食早餐又食咁耐？」 最最最最最重要，係講下次點樣做好啲！！！ 教小朋友講唔該都要教N次，何況係唔多發生嘅事呢！要提佢點做番好啲，先係徹底解決問題嘅方法。好似寶貝女細個有鐘意打人嘅問題，我唔會淨係叫佢唔好打，或者打人係唔啱等等，寶貝女由於有不滿或者唔開心所以想打人，我會教佢唔開心要點應付，真係想打人嘅時候要點提醒自己同捉住自己隻手仔，問題慢慢就改善咗。 做好媽媽，要時刻警覺，提醒自己，千祈唔好因為控制唔到情緒而影響親子關係，或者損失好好教小朋友嘅機會呀！
