寶貝女嘅閱讀能力，無疑係比同齡嘅小朋友好少少（唔係自誇，其實亦冇咩特別），但係親朋好友們都會提議：「不如轉過間好啲嘅學校啦！」lee句說話都唔知聽咗幾多次，尤其係今年！ 其實我明白大家嘅擔心。 寶貝女而家讀緊嘅幼稚園，課程係比外間嘅私校較為淺，睇吓下面張相就知，上面係學校嘅書，下面係寶貝女最鐘意睇嘅一本課外書，事實真係有啲距離。 爸爸都擔心，課堂上嘅嘢都識晒，會唔會令到寶貝女上堂唔專心？上堂唔到專心，對於日後學習都會有影響。 婆婆會諗，既然寶貝女有lee方面嘅「才能」，點解唔好好栽培？話唔定大個咗可以變做一個專業呢？（媽咪好似擔當咗「埋沒才能」lee個罪名添!） 朋友話，佢寧願俾人叫佢做怪獸家長，都唔想減弱個女嘅競爭力，仲問我怕唔怕第時寶貝女入唔到好學校，第時可能會後悔架！ 做媽咪之後，我真係睇咗好多育兒親子書，睇咗好多專家分享，睇咗好多外國嘅教育制度同例子，然後我自己都細心諗過，我教寶貝女嘅目標主要有兩個： 1. 培養閱讀習慣，等佢第時可以自己透過唔同書本主動學習更多知識； 2. 多啲同佢溝通，表達我對佢嘅愛同關心，等佢知道大個咗遇到咩問題，媽咪都係一個最好嘅傾訴對象，屋企隨時ready俾佢番黎求救； 閱讀習慣方面漸漸成形喇，寶貝女一得閒都會自己去攞書睇，未睇晒仲識用書籤夾住，等下次再睇，而家教緊佢喺圖書館搵自己鐘意嘅書，等佢自己喺lee個寶藏入面慢慢發掘；英文嘅閱讀能力，我只當係額外收獲，佢識嘅字越多，自然會明白更加多佢有興趣嘅資料，亦會推動佢學更多嘅字。 咁同轉學校有咩關係？當然有。而家受歡迎嘅學校都偏重學業，即係等如「功課多+壓力大」，當閱讀變成要求，小朋友仲有興趣嗎？當山長水遠放學番嚟仲要做3樣功課，小朋友仲有冇心機時間玩同睇書？我有懷疑…… 如果為咗功課、壓力、睇書等等嘅嘢，減少咗我同寶貝女溝通嘅時間，或者溝通嘅內容成日都係圍繞學業，又值唔值呢？ 除咗學業，小朋友要學嘅嘢實在太多，我寧願佢學識點令自己開心快樂、學識享受生活、學識正面思維、學識處變不驚、學識情緒管理…… 學業嘅事，一步一步啦，何必咁細個就嚇怕佢呢！？ 主動學習，唔識就會黎問媽咪，要一直保持住呀！
