[11-09-2014] 仲記得上年lee個時候，寶貝女話唔鐘意公主架，點知年初睇完Frozen之後，即刻好似中咗公主毒咁，由以前「我唔鐘意公主架！」到而家「我咩公主都鐘意架！」 小朋友真係變得快。 中公主毒嘅其中一個症狀，就係成日都想著長裙扮公主，自從上個月買咗嗰條粉紅色紗裙之後，寶貝女就日日都話要著：去野餐話要著、去探公公又要著、去會所玩又要著、去玩燈籠又要著…… 但係我始終都覺得，扮公主要扮得似模似樣，應該係一個package，唔係淨係著條裙就得，趁星期二中秋節翌日假期，就等你做一日公主啦！ 媽咪平時已經有提醒寶貝女一啲做公主嘅特質架喇，好似： 一顆善良嘅心～願意幫助別人，愛護地球，珍惜資源 舉止優雅有儀態～食飯搭車都伸直條腰，合埋雙腳坐定定唔周圍走 談吐斯文有禮～講嘢唔大嗌，唔隨便發脾氣，得到人哋幫助要多講「唔該」 講真，以上嘅嘢同公主真係冇乜太直接嘅關係，但係公主嘅形象咁正面，寶貝女又肯聽嘅話，所以媽咪借用公主之名去教佢喇！ 唔知係唔係條裙有魔法，著住條紗裙嘅寶貝女真係寧舍斯文架，平時坐得好粗魯嘅寶貝女，成程巴士兩隻腳仔都合埋黎坐，完全唔駛我提，食飯又食得斯文乾淨，扭計都少啲，原來著住條裙嘅寶貝女都識時刻警惕架！ 其實真係好難怪寶貝女咁鐘意扮公主，冇法啦，媽咪細細個都超鐘意公主，多得佢公公囉，我細細個就已經睇Cinderella同Sleeping Beauty學英文，卡通片入面嘅歌又好聽，好難唔令人著迷架喎。至於扮公主會有公主病？真係冇擔心過，喺我心目中嘅公主，係有外表亦有內涵，係一個complete package，媽咪希望完整地傳授lee個觀念，令寶貝女成為一個冇公主病嘅小公主。
