[06-09-2014] 身為在職媽媽嘅我lee排超忙呀，工作已經搞到我心力交瘁，一個又一個project，再加接二連三嘅顧客投訴，幾高EQ都搞唔掂。但係，我又點可以俾lee啲心情，延續到星期六，影響到我同老公同寶貝女嘅親子時間呢？ 講真，工作輕鬆啲嘅時候，真係好有心機周圍搵，睇吓週末去邊度玩，例如開Timable睇吓有咩親子活動啦（http://timable.com/），又或者約吓啲同學仔，搞個小型聚會等等，但係上星期成個禮拜都忙到癲，約人又約唔到，唔通星期六真係又番屋企玩大富翁？ 星期五晚，寶貝女突然同我講：「媽咪，我想去picnic！」吓？咁得意！原來佢啱啱喺圖書館借番黎嗰本故書事，講啲農場嘅小動物一齊去picnic，所以佢又想去喎！對於lee個突如其來嘅idea，好，就等媽咪成全你啦！ 由於已經係夜晚，唔夠時間做太多嘅準備，又要方便，又要簡單，就係以下lee啲囉： 地點：去野餐，草地好緊要，又要搭車方便嘅話，維園係我嘅理想之選 野餐墊：屋企冇，不過拎咗一張hello kitty大枱墊頂住檔先 食物：好彩屋企有水果同麵包，所以星期六一朝早就切水果同整三文治 飲品：果汁同清水，簡簡單單囉．．． 玩意：lee個最緊要，去旅行唔可以淨係食嘢架嘛，我哋今次帶一個拋波遊戲去玩，係用手拎住個魔術貼吸盤嗰隻，另外，按寶貝女要求，佢仲帶埋佢嘅baseball bat添（係用一張大卡紙卷埋嗰啲，睇吓張相，佢有姿勢有實際架！） 晴朗嘅天氣配合微風，加上唔多人嘅維園，真係令人有心曠神怡嘅感覺。一去到草地，我哋鋪好墊就開餐，食完就玩，周圍跑，周圍跳，簡單得黎好快樂，可能小朋友就係要嗲哋媽咪陪佢跑吓，佢就已經滿足。爸爸回想佢小時候都成日去維園玩，當年好多人喺個草地度一齊踢波，好多美好嘅回憶，而家帶埋寶貝女一齊延續lee一份溫馨感覺，最開心嘅，一定係爸爸啦！哈哈！
