好耐之前打街機或者睇漫畫留意到「灣岸競速」，其中有個角色叫做Gatchan揸凌志LS400同主角Akio鬥車。我打機時都曾經揸凌志㗎，不過現實生活幾時輪到我吖？ 話說我幫我上司向A記租車喺羅省揸，見到Premium Class（北美大型豪華房車，甚至富豪S60都得！）做特價梗係落訂啦，但係去到羅省機場呢，個員工話有一段時間冇同級車喺度。不過佢見人多唔好浪費大家時間，就免費升級啦...咁就整咗部佳特力XTS4出嚟！嗚呀！ 點解話呢個試車報告「極不正常」？原因如下： 香港人好少揸美國車，就算移咗民嘅都一樣 喺羅省揸四驅房車，使唔使呀？（即係咁，喺香港你有得揸豐田皇冠後驅行貨，無啦啦身痕去日本運部寒冷地區仕樣四驅皇冠番香港做乜？但係喺美加反而見怪不怪！） 佳特力XTS... 嗰啲係豪華的士嚟㗎喎！（當然喺美加，紅白二事都關XTS事㗎；香港就主力歐洲車做紅事，五十鈴做白事...你懂的） 咁攞咗車就開始我嘅羅省大暴走之旅啦。 大車的確係舒服嘅，特別係揸去聖蓋博 (San Gabriel, CA) 嗰陣好塞車，慢慢揸囉。 3,565cc V6 304匹行六速自動波（連paddle shifters），喺羅省一定夠用。加四驅係錦上添花，當然前驅版就慳油啲。 睇到個4字未呢？係指四驅版㗎。不過內華達州都要開四驅？ 四驅有度好係個彎時信心多啲。XTS原本係前驅吖，咁大部之餘，過彎都驚住轉向不足而出意外；我揸嘅四驅版呢，出入ramp都感覺到好定！25mph過急彎都可以！當然，部車嘅懸掛設定做得非常出色，比起以前美國車軟淋淋嚟講係進步好多。 奧迪S7同佳特力XTS4...唔同客路，唔同玩法（當然喺羅省揸S7一係真係有米識欣賞，一係就暴發戶啦。明啦，呵？） 咁送完同事們番酒店（各自食飯）後，我就約咗小學同學去羅蘭崗 (Rowland Heights, CA) 食嘢敘舊。喺美加，揸XTS多數都係豪華的士咁，姿柔淡定咁揸。但喺我手中同腳中就係另一回事！哈哈！由於過咗放工時間，羅省各大公路冇咁塞車，所以可以大暴走啦！ Paddle shifters加減波亦好聽話，話轉就轉。不過我觀察到二波上三波有啲chok。如果係自己部車，我打咗電話安排做service咯。 ...話就話可以逢車過車，但始終部車大份，都唔敢太亂嚟。 XDDDD 唔好意思，泊得樣衰。不過重點係：喺華人社區揸美國車係一件好ROCK嘅事！哈哈！Bucket list completed. 另一樣我都重視嘅係音響器材。XTS4已經用緊CUE (Cadillac User Experience）系統，大螢幕touch screen之餘包導航！（有樣嘢要彈係個touch screen反應冇咁快，打地址會論盡啲。）不過咁，佢睇到中文字！ 繼續喺加州聽「金句王」啲歌。（鬼咩，九十年代啲MV有啲喺北美影嘅，咁梗係想「應景」吓嘛！）（當然，「願你今夜別離去」個MV唔喺美國拍嘅） 美國版行mph，但可以改睇十進制。160km/h頂盡乜都夠啦。 喺去機場還車前，再同部車影相啦。 後泵把都幾長吓。雖然我泊車有後cam輔助，但係都驚會唔會刮底。哎呀。 喺唔落雪嘅地區揸四驅好似冇乜必要，但係行車方面更有信心。 條鈴設計簡單，望落舒服。 Verdict: 有機會租到嘅，真係值得試。雖然佢唔係直接同A8、7系、S-Class比，但係一樣坐同揸得舒服。高速航行又定喎。揸美國車一樣可以好型嘅。當然如果買嘅，有水嘅就買V-Sport版，有雙turbo V6 410匹同四驅！後生仔好似我呢啲其實揸ATS仲更加合適。 規格： 引擎：V6 DOHC 24v 自然吸氣 容積：3,565cc（香港牌費制度不合適） 馬力：304hp @ 6,800rpm 扭力：264 lb.ft. @ 5,300rpm 波箱：六前速自動波（有paddle shifters加減波） 傳動：前置引擎，前輪驅動 (XTS)／四輪驅動 (XTS4) 長x闊x高：5,130.8 x 1,851.66 x 1,501.14mm 軸距：2,837.18mm 售價：$50,815 CAD起 後記： 今次羅省之行亦搵到好嘢食，順便帶大家睇吓羅省市中心先！ 北京酸奶，加州製造，食得過 酒店早餐成支豆漿嚟？咁我唔客氣啦！ 以下呢間Bottega Louie呢，好多人慕名而嚟食糕點同意大利嘢食！淨係室內設計都好多相影！ 番到去聖蓋博去超市買嘢。啲野味真係...買唔買得㗎？ 下一回就介紹芝加哥啦！繼續嚟我個臉書專頁㩒個Like就可以有最新資訊啦！
