趁今日紅日放假，補寫八月份「本地遊」先啦！我知都拖咗好耐㗎啦。 喺加拿大，唔好以為公共交通同香港（甚至歐洲）咁方便！冇車係會論盡啲。所以如果情況許可，攞香港一二牌加國際車牌過嚟！冇都唔使驚嘅，巴士地鐵都會帶到你去啲旅遊景點嘅，慢好多同行好多路咁解啫。 話說我有朋友們喺香港過嚟加拿大玩，第一站就係多倫多。咁啱佢哋嚟加拿大嘅時候適逢放Civic Holiday，絕對係出遊吉日啦。但係佢哋只留兩日！點樣去先夠好玩同抵玩呢？ 第一站係...多倫多大學！仲要係前院King's College Circle嗰度！ 無他嘅，曾經何時我喺港大短暫待過，而探我嘅三個朋友們當中有兩個喺港大出嚟。佢哋都想知多大喺點樣（或者係我以前讀書嘅腳蹤！），梗係帶佢哋行一轉啦。 相中係University College。除咗係上堂外，仲係考試，甚至畢業典禮攞袍、起行去Convocation Hall、還袍嘅地方！（謎之聲：來日縱使千千闕歌 飄於遠方我路上...）一個充滿回憶嘅地方。 第二站：Casa Loma 點擊圖片放大 簡單嚟講係以前明門望族嘅大宅。由於我哋之後直接去瀑布嘅關係，冇時間入去參觀。另加部車泊咗街邊免費泊一個鐘，影完就要起行啦。 第三站：尼亞加拉瀑布 注意：千祈千祈千祈唔好讀錯為「尼加拉瓜大瀑布」，輕則俾人笑重則俾人「歧視」！個瀑布同南美國家尼加拉瓜冇關係㗎！哈哈！ 不過由於係假期關係，入到瀑布區已經塞死，連停車場都冇哂位！點知：有啲餐廳俾顧客泊㗎！加上朋友們都餓啦，唔理咁多就泊咗車，落車食飯！ 好熟識嘅意大利嘢食 頭先都講過餐廳停車場係俾顧客專用，咁但係再郁車就費時失事，所以我都特登問侍應可唔可以泊耐啲，佢話得！咁埋單時都要識做：俾多啲貼士再加泊車錢！（瀑布區通常泊車錢十蚊加幣起跳！） Four Brothers Cucina 5283 Ferry St Niagara Falls, ON L2G 1R6 +1-905-358-6951 瀑布區係點相信大家喺唔同途徑搵到資料，在此不贅了。 點擊圖片放大 +2 夜晚十點打後都有煙花睇㗎！ 第一日知唔知每人用咗幾多錢？計食同入油都係每人四十幾蚊加幣！搭GO Bus由多倫多聯合總站去瀑布來回要$36.30 CAD！ 咁第二日呢？ 第四站：釀酒廠區 Distillery District 又簡單咁介紹啦：顧名思義，呢個係多倫多開市初期有嘅釀酒廠，後來二十世紀末就慢慢停產。而家就好似香港牛棚（或者有啲舊嘅工廈做咗翻新）成為藝術家聚集嘅地方，另加唔同形式嘅咖啡店同餐廳。說穿了：真／偽文青都鍾意去㗎！ 點擊圖片放大 +2 羊肉三文治好好味 點擊圖片放大 +3 聞說香港有生果雪條熱。多倫多都有，仲要係自家製，健康美味！ 法國冇得俾旅客上鎖。多倫多而家得。哈哈！ 第五站：多倫多市中心 多倫多貴為泛美運動會主辦城市，點都整色整水嘅！不過都好多人去影。 CN Tower同水族館出邊嘅高樓大廈 出邊有火車展覽！免費㗎！ 聯合總站嘅戶外食肆 後記：臨送朋友們上機前特登車佢哋上去萬錦市食甜品。入去住宅區都算係咁啦。 豆腐花變咗飲品！ 短短兩日就去咗多倫多唔同地方。當然如果時間許可，可以再explore多啲嘅。如果係呢段時間嚟（十月頭）仲可以睇Nuit Blanche添！ 繼續嚟我嘅臉書專頁一齊交流吓旅行心得呀！雖然呢排會忙公司嘢會少update，但係一有啲新發現都會出post嘅！
