原來儲里數並不是想像中咁難！ 話說我今年初先開始儲里數，到現在只係大約四個月時間， 已經成功儲到逾3萬里數 (註︰3萬里數可換來大部份亞洲國家如韓國、日本、新加坡) 如果想知心儀地點需多少里數，可用官網的搜尋器︰ http://www.asiamiles.com/am/zh/redeem/flightawardfinder?WAright=TopNavFlightAwardFinder 我並非專業人士，公費外遊從來無我份 也非出生中產家庭，每月花費有限 平日死慳死抵都係為儲錢外遊~ 更加唔會食親飯爭住簽卡 咁究竟d里數係點儲返黎o既呢？ 等我分享下我點儲返黎啦 先旨聲明︰ 1. 為方便兌換，我只集中儲亞洲萬里通(Asia Miles)，所以未必係最低，因為換同一個地方，可能有其他飛行常客計劃仲抵，例如台北，Asia Miles要15,000，但Avois只需9,000，所以要自己搵一個最適合自己的策略 2. 我的儲里數方法係以「零成本」為基礎，即係兌換里數時免手續費，如果要手續費的信用卡，我會盡量選擇將分積換禮券/現金回贈，有機會再分享其他需要手續費兌換的信用卡儲里數攻略 ＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊ (一) 搭飛機 真金白銀俾錢坐飛機，所儲里數多少視乎航程距離及所購買的艙等， 經濟客位的Class S,N,Q可儲25%，其他100%。 經旅行社買package的話，通常機票也可以儲到25%的~ 但團體票(如Class O)不能儲里數，所以參加旅行團就九成九儲唔到 如果想計計儲到多少里數， 可以用官網的「飛行里數計算器」(按字可進) 呢幾個月我去旅行總共搭左3次國泰/港龍，全部亞洲城市， 一次儲25%(特價經濟客位)，一次儲100%(經濟客位)， 一次儲220%(特選經濟客位儲110%，加上有推廣兼享雙倍里數)， 共儲約一萬里數(全靠double里數的推廣，淨係呢次已經靠到6千幾里數) 唔好以為搭CX/KA就一定係貴，其實睇下你識唔識揀，撞唔撞啱優惠， 我之前的博文已經分享過九州同檳城的抵玩之旅~有興趣可以自行參考 (咁當然，如果你係背包客，唔鍾意搭傳統航空公司的話，就另當別論) (二) 顆伴機構消費 於以下的地方消費，可享不同的里數獎勵 如食肆是HK$8=5里數； 指定酒店每次入住送500里數； Agoda訂房HK$10=1里數 詳情可自行參考 http://www.asiamiles.com/am/zh/about/partners 酒店多數係國際連鎖品牌，房價唔平，所以要睇返洗費預算而睇下住唔住喇，或者可以住一晚嘆下，其他就用Agoda訂平房~ 其實以食肆計，大部份係酒店食餐廳，我幾乎唔會去。 但早前就撞啱小南國做推廣，消費滿$500送額外300里數+小籠包一客，那次吃飯我們四個人埋單約八百餘元，已儲到800多里數(未計信用卡簽帳)，超抵~ (三) 信用卡簽帳 信用卡積分是可以兌里數的，兌換率視乎各銀行而家 全城最抵用的DBS黑卡是$6=1里數泰，其他卡大約由$8至$15不等 留意部份銀行會收取手續費(DBS唔洗)~ 我主要用兩張卡儲，除左DBS黑卡， 我還有國泰信用卡($8=1里)，每月自動將積分轉至亞洲萬里通戶口，同樣免手績費，適合低消費一族，而且訂國泰機票或套票會送額外里數~ 好像我之前去了一轉檳城，雙人套票約$7,000，以$8=3里計算，已有約2,600多里數，還未計及機票本身的里數呢~ (詳情按此) *留這買國泰假期享3倍里數的優惠將於2014年6月30日完結 (四) 迎新優惠 呢部份係最容易儲、亦都係儲得最快！ 但要留意只係一次性~所以要好好利用~ 我用黎儲里數的兩張卡，都係今年先申請，唔計簽帳所得，淨係計迎新里數，已經賺左9,900里數~~~ 點解有咁多？ CX張卡申請送1,000，申請兩張附屬卡再送1,000，共2,000。 而DBS仲開心，因為最近的推廣活動(詳情按此)，搵到朋友推薦我送5,000，帳認新卡送500，我再推薦左幾個人，夾埋有2,400，就係咁儲到9,900 如果計埋迎新簽帳獎賞， CX首三個月簽夠$5,000送5,000里兼享$5=1里兌換率， DBS首兩個月每簽滿$5,000送500 (最多1,500)， 呢度又有2,000(獎)+CX本身簽帳兌1,000+DBS本身簽帳兌2,500，即係又有5,500~ 條數好簡單， 簽左2萬蚊，就有9,900(迎新)+5,500(簽帳)=15,400里數， 已經換到一張台灣/三亞/峴港來回機票，比起平時要最少簽9萬蚊，慳左勁多！ ＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊ 總括來說，儲里數最緊要識計數，例如有大筆數要簽(去旅行、交學費、買電話等)，就記得睇下當其時有咩卡做緊迎新優惠/推薦計劃/簽帳獎賞，務求賺取最多的回報(積分或里數都係咁話~) 而家就有幾個不錯的推薦計劃︰ 1. DBS「你．友．賞」(受薦人可享500-5,000迎新里數) 2. 國泰卡推薦計劃(受薦人可享1,000至1,500迎新里數) 3. 渣打AE卡經網上申請送3,000里(開立戶口可再送高達50,000里) 頭兩個推廣都需要現有客戶推薦，有需要可找我幫忙，等大家都可以快d儲夠里數換免費機票！
