每個人都有青春期，總有一兩次遇過暗瘡大爆發嘅時候，成臉佈滿紅色炸彈咁凹凹凸凸好核突。如果撞正轉工見新同事、岩岩拍拖見家長、過時過節見親戚就最為尷尬，覺得身邊個個都歧視緊自己塊面咁，成日都搵野遮住自己塊面，好無面…… 我經歷過一次就永遠唔想再次經歷，特登出一篇文章黎講呢段心路歷程，點樣爆瘡直到點樣好番。 2020年應該係人類歷史上最多人一齊戴口罩嘅一年，冬季戴口罩就話保暖，夏天戴口罩簡直係酷刑，而戴住口罩去做運動應該係最癲嘅極限運動。我嘅暗瘡就係係夏天戴口罩嘅期間爆發出黎。我覺得生暗瘡係由多個因素造成，絕非單一原因，而且一旦爆發，會爆得愈黎愈勁唔識停，一粒好番另一粒又起！ 以下係我認為搞到自己爆瘡爆唔停嘅因素： 當時有段時間Home office，有排好鐘意係屋企打邊爐食肥牛，身體慢慢積落啲牛毒素都唔定；夏天戴口罩，一落街行兩步就滴哂汗，塊面成日又濕又焗搞到更易惹瘡；夏日炎炎三十幾度，去左海灘游水，而且無查好防曬，塊面曬傷左之後第二日額頭爆左十幾廿粒粒粒；爆瘡期間見朋友，堅持要化妝見人，日日用粉底，仲要用錯左隻好笠嘅粉底，搞到塊面愈爆愈勁，油脂粒暗粒石頭瘡都出哂黎；爆左咁多瘡，好心急想清哂去，於是不停去針清，但又無比皮膚好好休息，繼續出街化妝，搞到塊面嘅暗瘡反覆地生唔停。 當時成個樣恐怖到想匿入山洞唔見人…… 爆左兩個月，終於頂唔順去睇醫生食藥(四環素)，整個療程要食足三個月，唔可以停；另外繼續去做唔同嘅Facial急救塊面，做過BellaSonic、海藻矽針、中藥Facial，定期適當地做針清Facial(起碼隔番兩至三個禮拜先做一次)；家用護膚品方面，全部轉用哂天然成分嘅產品，試用左隻新西蘭品牌GeoSkincare嘅產品，買左一支皇牌補水嘅家用納米水光槍，配合一隻叫ＦＮ修復原液打入皮膚底層吸收，一禮拜用兩次；另外，每日朝早同夜晚都必用一款叫ＳＯＳ萬能急救霜，質地水潤易吸收，而且有驚人嘅補水+修復皮膚能力。自從轉用左護膚品之後，皮膚乾燥嘅感覺都無曬，唔再好似以前咁成日好痕好想Ｒ！ 除左食藥、做Facial、轉用護膚品外，飲食習慣都要改變下，唔好成日食煎炸油膩野，同埋一定要戒牛奶同甜野；每禮拜都要抽兩三日出黎做運動，郁多啲流多啲汗，排走身體毒素，仲可以保持心情愉快！ 再過兩個月後，我臉上嘅暗瘡已經凋謝哂，得番啲暗瘡印係度，同埋毛孔變得粗大左，雖然塊臉係有明顯好轉，但依然仲未完全好番哂，袪除暗瘡印+收毛孔+美白係下一階段嘅目標！
