旺中呢個地方,以前讀書時期最愛去行,個陣最愛放學同朋友一齊出黎旺角行下街,食下小食,呢度的衫對於學生時期的我最岩,又夠平又夠潮(個陣的品味真係不堪回首),出左黎做野之後已經好多年無黎呢個地方。估唔到事隔咁多年,旺中搖身一變做第2個葵廣,之前上網見到有關呢間食店的介紹時已經好想去食,呢度主打12吋長的韓式窩夫,其實之前係首爾弘大時已經見到,但當時實在太飽無食到,依家香港都有,更加吸引我去試!於是決定同老公去試下! 12吋長的窩夫有好多味道選擇,例如之前好hit的紫薯窩夫、炸雞窩夫、Oreo窩夫同埋我老公好想食的榴槤窩夫!如果你怕食唔哂12吋長的窩夫,仲有半條可以選擇! 雖然呢間食店主打窩夫,但都有其他小食架!例如:芝士蘑菇釀雞翼、紫薯餅、韓式魚糕、芝士流心蝦餅! 雖然老公好想食榴槤窩夫,但因為我唔食的關係,所以我地叫左半條黑松露碎蛋窩夫,而且加$8有埋小食同飲品! 黑松露味道濃郁,配合碎蛋,感覺有小小似食三文治,但係麵包變左煙韌的窩夫,相當好味! 加左$8的小食 - 炸薯條,炸得好脆,佢仲有蜜糖芥末醬比你點黎食,好味! 巨峰提子梳打,不過不失! 「NUN ASIA」 地址:旺角彌敦道688號旺角中心1樓F84號舖 「YING住食住行」已經開左係Facebook開左專頁喇! 歡迎大家入去比個like丫! www.facebook.com/yingyingstyle