【Ying住行】韓國買食住玩行程小分享 – 下篇

seoul

上篇提到”買”同”食”的小小行程分享,今次再為大家分享”住”同”玩”!

住宿方面:

之前大多數住係東大門區,貪地點近地鐵站同埋可以夜晚行下東大門夜街同食下宵夜。

華美達酒店:之前我地住過係香港都有的華美達,我地分左兩間三人房,我住個間三人房好光猛而且職員好好,佢見我買左一盒叮叮食物放係房,個晚返黎佢拎左個微波爐放係房內!但家人另一間房就比我地差好多,首先間房燈光非常暗,其次就係個廁所突然塞左,以及發現有血漬的床單。而位置方面,行過去東大門購物區要10分鐘度!

low_big_106368*圖片由網絡下載

IBIS東大門:呢間酒店其實都幾好,首先位置好方便,行過東大門購物區及地鐵站只需3分鐘。但房間就有小小令我地驚訝,個次都係住3人房,不過房間好細,每次只可以開一個喼,而床係碌架床,下格係可以訓兩個人,上格係訓一個人,咁岩我個次係個邊拉傷左個膊頭,本身我係訓上格床,但因為拉傷左而上唔到上格床訓,所以碌架床都唔係太方便!而最令我地驚訝一定係沖涼位,因為佢同洗手間係分開,其實間房的設計係一開房門,右邊就係洗手間,再向前行右邊就係企缸的沖涼位,而且個沖涼間棟門係透明,再向前行就係碌架床,最尷尬的係沖涼位無門遮掩,每次有人沖涼,其餘兩人的活動範圍只可以係床及書枱,真係好唔方便!

ibis2
*圖片由網絡下載

IBIS

Western Co.:仍然係東大門區,呢間暫時係住咁多間裡面最方便,房間又舒適的酒店,首先位置隔離東大門購物區及地鐵站只需5分鐘,酒店旁邊有間比較大小小的GS25便利店,好方便夜晚買宵夜,而我地個次住的二人房都好大,房內有一個好大的空間可以開哂兩個大喼都無問題!

western
*圖片由網絡下載

玩樂方面:

去韓國旅行唔係淨係得shopping既,都有景點係岩男朋友/長輩,例如以下介紹的地方就好適合一家大小去玩喇!

江川鐵路單車Railbike:位於金裕貞站江川鐵路單車因為Running man而更加出名,好多遊客會特登去玩,係已經停駛的鐵路路軌踩單車的感覺別有一番風味,沿路仲有好靚的風景及3條不同主題的隧道。

railbike

南怡島觀光:南怡島位於江原道春川市,呢度最出名一定係因為一套韓劇「冬季戀歌」係呢度取景,呢度的風景無論春夏秋冬都係咁特色!我對上一次去雖然已經係楓葉季尾,但島上仍然有好多楓葉,當遍地楓葉真係好靚!

南怡島

松月洞童話村:童話村位於仁川站,由市區搭地鐵大概一個鐘就可以去到!講明係童話村,裡面有非常多畫得好靚的壁畫,猶如走進童話裡面。呢度好適合大家帶埋小朋友黎,裡面亦有不少壁畫係關於童話故事的主角!除左小朋友,亦都係情侶的拍拖勝地,來這個地方逛一逛,等另一伴為你擔當攝影師!大家來到呢度亦可以去必經的中華街食中華料理,試下韓國特有的炸醬麵!

松月洞

曾坪兒童單車公園:呢度我仲未去過,但上網睇簡介時已經好想去,其實佢係 個教導小朋友交通安全規則的公園,就好似我地香港的交通安全城。把街道上的建築物和馬路通通縮小,就好似置身於小人國內,而且裡面的建築物全部都以糖果色做主調,真係既夢幻又有趣!

bike*圖片由網絡下載

希望以上資料可以幫到大家去規劃行程喇!

 文章回顧:

【Ying住行】韓國買食住玩行程小分享 – 上篇 “Click me”

【YING住行】江川鐵路單車Railbike “Click me”

【YING住行】南怡島賞楓葉 “Click me”

【Ying住行】情侶影相必到松月洞童話村 “Click me”

「YING住食住行」已經開左係Facebook開左專頁喇!

歡迎大家入去比個like丫!

www.facebook.com/yingyingstyle

This entry was posted in 住宿, 南韓, 興趣, 觀光, 遠足. Bookmark the permalink.