生BB究竟有幾痛? 有幾辛苦? 人生有d真係經歷一次好足夠? (政府預產期: 1月30 , 私家預產期: 2月3 , 政府催生期: 2月7 ) 不知不覺去到懷孕晚期,踏入 37 週開始不停諗究竟自己邊樣黎先,又會諗究竟點做。 試過有一日假宮縮得好勁,以為係..點知第 2 朝都冇事。 直到睇最後一次私家醫生,1月24號,39週1。醫生話頭仔落左 5分1,應該重有一星期。 好啦,咁就打算慢慢等...分分鐘要催生。果晚仲去左買西瓜諗住第2日食。 唔知係咪因為呢日行多左,原本話一星期後先生,好似加速左產程。 (吳生: 其實當初都幾擔心阿女要催生,因為越遲生,阿女就越大份,越大份就越難生, 一直係私家check都係中細碼,期望生時唔會太辛苦。所以 38 週開始都慢慢食D涼野) 第2日 - 25號 (39 週 2), 9點起身見紅,見紅係成條 underwear 都係血,唔係小量。 由於吳生已經返左工,即時被我召回家。 其實呢d真係預唔到時間,平時佢返工我一定去廁所,不過果朝咁啱又冇去。 証實唔到係咪當日朝早已經係有見紅。所以有時真係整定,亦都唔到你預計。 (吳生: 懷孕後期,我返工時電話一定要開聲,重寫低埋公司電話比家人,以免搵唔到自己, 當時我係公司聽完電話看似好冷靜,但其實個心裏面已經亂晒大籠, 手頭上既野要諗下點樣交比同事,又要計劃下搭巴士定係的士, 又擔心吳太身體唔知有咩變化.....好多好多野諗!但吳太叫我慢慢,我就揀左巴士喇, 今次搭巴士可能係一生人覺得最耐既一次!) 通知完吳生,就叫左家人買飯,我就去沖涼、洗頭、吹頭啦。我仲夾埋頭髮添! 我承認比較貪靚,堅怕自己變左癲婆一名,不過事實係...係過左2日先至生, 夾同唔夾既分別已經冇咁明顯。食完飯,大安旨意等埋吳生返, 慢慢咁行去搭的士到達威爾斯醫院。 (吳生: 雖然吳太一早講過佢會食飯沖涼洗頭整理下個樣, 但當時既情況,我相信係老公都會覺得 "會唔會冷靜得濟呀 ? " 我經常問下吳太有無覺得邊度痛,邊度唔舒服,就怕佢貪靚而無視左自己身體, 估唔到連我都有個飯食 (心諗呢個時候重食乜飯.....邊有胃口 ! ), 拿拿聲食埋想去醫院,但吳太又要夾頭, 我覺得越早去醫院,個心就越穩,因為永遠唔知醫院要等幾耐 ! 不過見到吳太行路都 ok 時,都少左擔心既 ! ) 當時上午11點,樓下登記完,直上 7/F,當時要求轉一等/二等房, 做左一輪文件野 checking後,安排左普通產前病房,不過好好彩係2人房 (有d Area係6張床)。 一等/二等房係要排,而當時登記個護士冇幫我地排, 係吳生探病時間幫我問另一個護士,答覆係暫時冇位,但會幫我排。 (吳生: 係 7 樓登記個護士忙到手忙腳亂,又叫我出走廊等, D文件係晒我度,又叫我出門口等,真係超級無奈, 當時既情況吳太重邊有可能自己係個袋入面搵你想要既文件丫 ? 之後吳太入產前病房換衫,我係出面等左半個鐘左右都未見佢返出黎, 果刻都幾無助,等到探病時間即刻入去搵吳太,後尾知道換衫後去左做檢查) 威爾斯探病時間係 12:00-13:00 and 17:30 - 19:30 將所有野安置好,叫吳生返去休息,到果陣都係見左一個醫生問診。 即係 冇幫你睇過其實仲差幾耐,會唔會趕你走咁,只係你講咩,佢就信你, 冇話會幫你睇下係咪就生,亦都唔會有照聲波幫你照。 25號 lunch 食左第一次既醫院午餐(中餐),葡國雞扒飯係基本份量,得1塊雞扒,小量汁, 完全唔夠送飯。 到左5點左右,有姑娘問我係咪轉二等房,我話係,點知對方話有一等, 我好幸運咁拎左個一等房。呢度有小插曲,因為我隔離床係公務員家屬, 但佢係因胎動少左而入黎,37週左右,佢係想返屋企,d 護士一度將我同佢意願倒轉, 問我係咪要走,我心諗我見紅到都幾誇張,所以都唔會走。 我轉左去樓上 9 樓私家一等,一個人有電視,自己廁所(有得沖涼),床係可以電動較高低。 轉左冇耐,吳生買左麥記比我食,同埋食左琴日買而未食既西瓜。 膳食方面,呢到就有得揀西餐,之前上網睇過西餐係好食,所以諗都冇諗到, 就 order 西餐,好多時我都食唔晒,吳生都幫我清晒,哈哈。 (吳生: 個餐係有 1.25 份,應該係 for 懷孕的媽媽先有,生左之後個餐變返 1份, 西餐真心好食,拍得住出面西餐廳,應該普通病房都有得轉食西餐, 唔 sure 駛唔駛加錢) 呢一刻我仲諗住咁舒服可以休息訓一晚等陣痛來臨。 而係吳生走左之後,我都開始坐波波(fit ball),基本我自己2個鐘就坐一次,每次 30 mins 26號凌晨,大約 1點開始陣痛,用app計,大約 8-10 分鐘所以訓得都唔算好, 加埋另一間房個BB non stop咁喊,我諗斷斷續續都訓左一個中左右, 到凌晨 5 點至 7 點先訓到。期間d姑娘最多都係問你有冇短左時間,邊度痛. 呢日醫生早上9點左右內診,話開左勉強1度,內診係佢插隻手入去子宮check個口有幾大, 呢個醫生好粗暴,痛到死去活來,本身見紅既量小左 比佢睇完,又再澎湃咁流。 呢個時候既陣痛都只係 m痛咁,不過係辛苦d,每 9 分鐘一次,出晒汗。 訓又訓唔到,只可以得閒就玩下波,其實當時都唔知玩波係咪真係有幫助, 只係個個都咁講,我就愈來愈勤力去坐。 (吳生: 呢個時候我既作用只係盡量幫下吳太,睇下有無咩要拎,咩要執, 每次見到佢痛,我都覺得好心痛,因為真係無乜做到,只能夠打氣同安撫下, 每次黎都有同吳太玩fit ball,明顯地佢玩完ball係無咁痛既) 食完晚飯,其實已經每 5分鐘痛一次,姑娘有問我 check 唔 check。 我第一下就話唔check 我好怕失望。我好怕聽到重係一度,好怕自己冇勇氣繼續咁痛落去。 個姑娘見我忍到咁就 suggest 比暖包我,仲教我用腳夾實枕頭 咁會開得快 d 喎. 佢之後再幫我check 過,都係得2度,但宮頸好軟,即係愈來愈易開度數。 其實聽到宮頸軟係開心左,雖然經歷左 20個鐘都係 1度 。 果刻記得我都係叫左吳生返去先,雖然預左今晚有得生,但可以返去休息就休息 唔想大家一齊累,更加唔想佢好無助咁睇住我痛。 (吳生: 當時已經 over 左探病時間,雖然未有護士趕我走,但自己都準備走人, 見到吳太好辛苦....但我都要忍心離開,因為我唔想到吳太生得既時候, 我太累支持唔到佢 or 幫唔到手) 到左11點左右,我頂唔住,叫姑娘睇下,然後姑娘話3度半,就4度 ! 送我落去產前房,因為私家既設備係冇咁好,接受唔到隨時生,叫我打比老公。 呢短短既時間,我真係死去活來,痛到個人係到典黎典去。 吳生黎左之後,見到我好痛苦,即刻搵姑娘再check多次,已經去到 5 度, 即刻轉落產房,果陣都只係半個鐘既事。 送我落去期間,其實我知道自己要用鼻吸口呼,但好難 focus。 吳生事後話覺得我會休克,因為我根本 focus 唔到望住佢。 (吳生: 當時我去到醫院,無直接去產房,因為產房未必有人理你, 所以我直上 9樓confirm究竟吳太係咩位置,turn out重係病房入面, 吳太訓左上另一張移動病床,我見到佢痛到面容扭曲,成個身係打側捲曲,嚇死我, 果刻我覺得佢係就黎休克,痛到頂唔順, 吳太話 唔得喇,要痾,忍唔住,我即刻去搵護士叫佢睇睇, 護士們重打落去產房,唔知話未有房定未有人,所以未落得去, 之後我就係吳太身邊叫佢 focus 望住我慢慢吸氣呼氣,保持清醒) 推到落產房,得我一個人入去,入到去不停有姑娘問你野,而你真係會聽唔到佢地講咩。 我重記得入去果陣係12點未夠。 一輪檢查之後,完全係諗住終於生得… 但當有呢個諗法既下一秒,護士走晒,冇人理我。 因為通宵更,所以d姑娘未停過,一個生完接一個,人手根本不足。 而我明知係唔好用力嗌費事晒氣,但真係好痛好想痾, 我已經痾左唔知幾多便便,出左幾多血係張床到。但重未開始生,每一次痛到好急好急, 我係忍唔住要嗌,我個人其實駁住部胎心機,聽住bb心跳, 每次痛我怕我會忍住氣 咁就提供唔到氧氣比呀女,我會一痛就聽住佢心跳, 一慢左或者冇聲,我係咁吸入空氣,好驚要開刀,好驚會累到呀女。 (吳生: 我係產房出面無助的等待,永無止盡,無人比你問,無人會理你,只能夠等, 期間有幾名同路人,一個中年男士問我借口罩,可惜我無,佢最後去左買, 另一名男士坐我旁邊同我閒聊幾句,得知佢太太穿水感染發燒,所以要開刀, 座位得 8 張左右,其實都幾少,不過半夜無乜人,所以 ok 夠坐,全程無行開過, 無野好做,只可玩電話希望快d叫吳太的姓名~~) 去左差唔多一個鐘 00: 45 左右,我就已經 7 度,重穿埋水,羊水係暖, 同埋自己真係 feel 到 "啵" 一聲,有人幫我清理左 1 次下半身,準備生b。 一直係咁痛,同埋聽住其他人既叫聲,唔係一班人係咁輪住嗌,通常只會聽到隔離房。 如是者,一個人係產房到痛,每次想屙果下就同呀女講,爸爸未入黎,等多陣。 係我完全覺得比人遺棄,好無助既時候,有個年長d既護士走埋黎講唔好再谷,放鬆, 接住就開始有班人自動埋位接生。吳生都入左黎,護士重叫左我名一次, 我唔知當時既我係點,但其實吳生講咩都無印象,只係聽到姑娘講出力。 當姑娘講話生得,即係痾得,真係吸一口氣,要用到落底,係痾盡,先再吸, 姑娘話出左1/3既時候,陣痛又黎,再用多次力,不過我今次冇咁用力同好快冇氣, 果下我係知道姑娘剪左會陰,最後一次用力就生左。 (吳生: 入去果時我拎住落產房要用既袋,但全程係無用過,亦無其他人拎, 入去果時姑娘問我驚唔驚血,呢個時候重點會驚血!淨係想快d見到吳太, 行入房企係吳太旁邊,當時吳太望落好虛弱,我真係好驚佢頂唔住,見到佢成臉都係汗, 不斷提佢吸氣呼氣,護士叫佢做既野,我又同佢講一次,不斷提住佢,又不斷打氣, 讚下吳太,等佢可以stay focus,結果用左三次力就生左阿女出黎,真係好勁 ! D人又話會自己剪臍帶,又話會有人影全家福,事實係無既,唔知係咪因為太忙) 生完我根本咩都諗唔到,睇唔到,唔知姑娘做左d咩。 望住吳生話 "我唔生第2個",但其實已經唔記得當時我講過咩,只係覺得好虛弱。 望住吳生我都好心痛佢個樣好擔心,我聽到佢一直為我打氣,一直咁讚我, 我好幸福有佢係身邊。 (吳生: 其實生BB真係好大風險,要好大勇氣,所以我覺得吳太真係超勁超犀利 ! 偉大的母親 ! ) 生完5分鐘之內,呀女清潔完,姑娘講左一次佢出世時間,重量,性別, 抱埋我心口做肌膚之親。即係皮膚對皮膚,比呀女感受我溫暖,聽我把聲,聞我既味。 其實我睇唔到佢個樣,因為佢係扒係我心口中間望向吳生。 我同吳生一路講野,佢就打開眼偷望我地,我除左聽到出世果下喊過, 之後佢都靜靜雞唔出聲,八卦我地講緊咩。我地對話內容好似係呢2個中內發生左咩事, 影左相報平安,同埋收到一堆夜貓子朋友既祝福。 本身好快就上返自己 9 樓房,但同一層咁岩有 6 個bb出世, 我地果層既姑娘太大paper work 要做,連床都唔夠,所以係產房抱住呀女都超過一個鐘。吳生係出面等我,陪我返上房,幫我打點所有野,佢先回家,要到探病時間先可以過黎。 辛苦佢要幫我做打雜,拎呢樣各樣。生完要過左6個鐘先可以落床。 我其實都冇點訓。姑娘叫我餵奶,餵完又話要肌膚之親耐d 。 到話想放落床,又話一陣有人黎幫b女沖涼,叫我抱多陣。 基本我係抱到食早餐,先至放低左呀女,一個人既湊女生活堅辛苦, 重點係我落床既力都冇,勁驚會跌倒佢。 12點探病時間到,吳生同奶奶一齊黎,奶奶煲左湯比我。呀女都嫲嫲, 係吳生未習慣抱,呀女覺得唔舒服,但吳生已經好叻,以前佢點都唔會抱。 佢好有勇氣咁抱呀女,希望可以減輕我負擔。 題外話: 係一等病房,食左好多日西餐,係真心好食,比朋友仔話我似去旅行。 份量又多,每次吳生都會幫手食。一等既病房股務係舒適既。 (但西餐係無飯既)