扮文青黎講,就要去下松山文創園區吸收下D靈氣。園區前身係「台灣省菸酒公賣局松山菸廠」,喺1998年停止生產後,喺2001年被列為市定古蹟,幾經整修後先轉型到目前嘅松山文化創意園區。 園區入面有好多當地設計師產品、市集、唔同主題嘅展覽,仲有誠品松菸店,慢慢行嘅話,不知不覺就行左幾個鐘,唔駛趕,享受吓慢活節奏。 想休息可以喺戶外公園行下坐下,發下呆,過番一陣退休生活。 今次不定期展覽係我地都好熟悉嘅Cherry小丸子,仲有小玉同花輪同學添。 誠品松菸店 除左喺香港誠品都見到嘅野之外,佢仲有art house,戲院,performance house,誠品行旅(酒店),書店嗰度仲有好多櫈,俾你坐喺度打書釘,個文化感係濃郁D。 閱樂書店係當年菸廠員工嘅育嬰室,而家就變左書店+cafe,可以飲杯茶食個dessert。 行離左誠品,向市政府捷運站行,就見到好想走九遍嘅忠孝東路,沿路係好多風格小店、日式pancake店,咖啡店等等,我最後揀左一間叫湛盧咖啡嘅坐低,佢喺台北都有好幾間分店,係當地有名氣嘅精品咖啡店。 店員非常清楚介紹每一款咖啡豆嘅口味,仲俾我聞左好多款先再揀,menu入面都有詳細介紹,最後揀左「台北曼波」,回甘同煙燻味都似台式老咖啡。 order 完之後,沖調師會拎埋架撐去你面前沖完就可以即刻飲喇。 Enjoy! 嘆完咖啡,又再閒逛到市政府站,W酒店樓下黎自日本嘅蔦屋書店,日本迷應該唔陌生,佢曾經被評為世界最美書店之一。 同誠品一樣都係走氣質格調路線,但產品brands就以日本牌子為主。 同埋光線擺設令人覺得溫暖D。 等我扮完台灣文青,而家又扮下日本文青先。 HEDERA係佢地自家文具品牌,簡約、有質感、定價唔高,值得入手! 除左設計、展覽、咖啡與書,所謂文青之旅點可以冇音樂呢? 這些年來喺YouTube睇過唔少歌手喺河岸留言開mini concert嘅片,何韻詩、張懸、徐佳瑩等等,而且好多非主流獨立樂隊同新進歌手都歡迎喺度開唱,所以我都希望有一日可以睇到現場。 而呢一日到左喇,台北有兩間河岸留言,差唔多每晚都有表演,今次去左公館站本店。 呢晚有兩個單位演唱,認真地說,睇show之前,我係唔認識佢地,但係聽完之後我覺得係值得去睇。 第一個係黃宇齊,佢係蕭敬騰同林宥嘉做導師嗰個叫「聲林之王」嘅歌唱比賽節目入面嘅其中一個選手(好長嘅介紹⋯⋯),女仔唱ROCK比較少見,但佢嘅音色係幾適合,仲因為佢認識左日本嘅one ok rock (恕我孤陋寡聞),又係正野黎嗰喎~ 河岸留言18週年紀念啤 第二位叫Sarya,我quote番官方介紹先: //在美國出生,台北長大的詩人歌手。本來在愛丁堡發展她的詩,也開始在地下通道裡用ukelele自彈自唱。sarya的音樂很空靈,因為受到北歐的影響,也是因為她想留下在山洞自然回音的感覺。// 我相信大家已經好明白佢嘅音樂風格。 其實係好特別,佢有一首放左上spotify ,大家訓唔著可以聽下, 因為佢係叫「失眠之歌」,送俾大家,晚安! https://www.youtube.com/watch?v=qxTGSzKj6Qo 更多遊記喺 https://www.uncle7world.com/category/all/travel/