【丹麥】哥本哈根即日來回 Legoland + 世上唯一樂高之家Lego House(有半價火車票攻略)

丹麥係Lego嘅發源地,所以無論係Lego fans、一家大細、一班朋友、情侶,又或者只係去哥本哈根旅行嘅人都建議可以黎到位於丹麥北部Billund 嘅Legoland 同佢地嘅Head quarter “Lego House”。

嗱,大家都話北歐物價好貴,咁首先就同大家講下可以點樣用經濟D嘅價錢去到Legoland先啦,唔計自駕,最常用嘅方法就係搭火車來回哥本哈根同Billund.

火車飛黎講,就要上去佢地國家鐵路網度訂,現場買飛係一個嫌錢腥嘅玩法,我試過去到check部買飛機,即場價錢係我買嗰時嘅三倍價錢,貴過legoland入場劵。

網址:https://www.dsb.dk/en

個網喺兩個月之前就會放特惠飛(Orange ticket)出黎,賣哂就冇,所以如果愈早計劃行程就可以愈大機會買到平飛。

我地住喺市中心,所以買車飛由Kobenhavn H (Copenhagen Central)出發,去到Vejle,之後再轉巴士到Legoland。

記得TICK “Show me cheap DSB Orange tickets” 先會見到平飛。

留意番,因為Billund同哥本哈根係兩個城市,Copenhagen Card係包唔到呢兩程交通。

另外入園7日前喺官網訂Legoland入場劵會有9折,而且到時就咁嘟QR code就可以入場,唔駛排長龍買飛,你見到條龍時,會感激我提左你 :p

https://www.legoland.dk

當然我要戴番頂帽,所有優惠都係以佢地官網為準啦,我地呢D小市民黎㗎咋。

講左咁耐,終於出發喇!

哥本哈根中央車站

上網買車飛時,佢會問你加唔加錢留位,如果你加就會見到你個位上面,行李位對落寫左你程車嘅起點至終點車站名,相反,如果冇加錢留位就可以坐番一般就咁寫左Kan være reserveret,即係can be reserved嘅位置。

酒店嘅人提議我地可以去車站一間叫”LAGEHUSET”嘅舖頭買早餐食,D Croissant同咖啡都唔錯,搭早車朋友都可以試下幫襯。

由Copenhagen Central,去到Vejle大概要3個鐘,到站後,要行番出去轉巴士去Billund。車費DKK65/位,最簡單方法可以上到車俾現金買飛(北歐消費推行無紙化,但呢個位係少數唔收卡嘅地方,俾歐羅現金唔抵,要EUR10 )。

如果唔想唱現金,就可以喺香港download 定 一個叫”sydtrafik” 嘅apps,reg 埋信用卡,到時兩個鐘內買巴士飛都得。


揀啱fra(from) 同til(to)
第三個係時間,第四個係人數
兩個鐘內有效。

車程大概半個鐘,我地揀左喺尾站Billund Centret 先去世上唯一Legohouse 先,之後再行番過Legoland。

Lego house。高炒睇係會見到好似用lego砌左個building出黎咁。

即係咁樣。

就咁沿住外面梯級行,都會搵到唔少影相打卡位。唔同顏色嘅lego區都有唔同嘅配置。

行到去天台就係平時LEGO 嗰8個圓點,經透明圓點可以望番lego house嘅內部。

天台望出去個景…嗯…加個熱氣球嘅話,我會覺得自己驗緊眼。

行番入去,當然會有lego shop啦,佢仲有lego house brick 係喺其他地方(甚至legoland都冇嘅)都冇得買嘅,大家可以尋下寶。

用自己樣訂製一幅Lego 畫像又得!

砌唔同形狀嘅lego 先點到餐!

其實lego house入面有唔同嘅experience zone (要買飛入場)可以俾小朋友同大人發揮創意,但我地今次就冇入到去,如果係一家大細又會喺附近酒店留宿嘅話,可以考慮入去玩下,話唔定創造力量同幻想,會嚇你一跳!

參觀完lego house, 我地就慢慢行番出legoland, 沿途會經過hotel legoland, 鐘意都可以入去影下相。

15分鐘左右就行番去legoland

Legoland Billund入面嘅景點都幾豐富,有刺激、益智、休閒嘅選擇, 相信唔同嘅人都可以搵到自己鐘意嘅野。

ATLANTIS 入面真係有一個水族館,你會見到唔同嘅lego角色完美卧底喺水底。

有4D影院,兩個劇目,分番唔同時間入場。

Lego NINjaGQ 區

係忍忍忍忍忍者呀!

嘩。。等我避。避。避。。。噢。。睇黎要減肥喇。。。各位對自己身手有信心嘅朋友都可以挑戰下呢個遊戲。

另外有一個坐車掟飛鏢嘅attraction, 不過入面太黑,咩都影唔到,但值得一玩。

樂園入面有好多好多好多唔同嘅lego模型,好似下面呢個咁 (請自找亮點 XD)

Lego朱古力,冇食到。

樂園入面有好似小人國嘅地方係用lego砌出歐洲,甚至全世界有名嘅建築同景點。

好有丹麥感嘅紅屋頂。

哥本哈根熱門景點 – 新港

Lego Tower, 可以喺高空360度睇哂成個LEGOLAND。

有激流玩,小心濕身,我地同船有個男士濕哂身,俾同船兩個唔識嘅小朋友取笑 :p

個場面都幾有趣。

如果你鐘意玩過山車,呢度有最少3,4款俾你揀,而且好似都係堅堅地嗰隻,可惜我唔玩過山車,俾唔到意見你,但見佢轉左好多圈又勁高咁嗰D啦~

連企鵝都有得睇!

如果想輕輕鬆鬆咁遊園,可能小火車都係一個唔錯嘅選擇。

歡樂嘅時光過得特別快,又係時候帶住依依不捨嘅心情離開喇!

回程喺legoland出面搭番巴士出vejle 再轉番火車就OK喇~

FYI,Copenhagen Central 同 Vejle 中間會經過Odense (安徒生故鄉),所以有D朋友會選擇喺Odense玩一日,逗留一晚再出發。

 

 

 

This entry was posted in 丹麥, 主題樂園, 主題樂園, 其他, 其他, 其他, 其他, 外遊美食, 好去處, 攝影, 活動, 消閒, 觀光, 酒店 / 度假村 and tagged , , , , , , , , , , , , , , , , . Bookmark the permalink.