又到各間大學舉行畢業典禮嘅日子,大家都預左Facebook會被瘋狂洗板。阿多我經過幾年Full time job + Part time study嘅生活,終於都成為其中一個畢業生!心情真係百感交雜。經歷過大大小小嘅畢業典禮,我地發現有好幾個容易被大家忽略嘅細節: 1. 著有企領嘅恤衫 唔好以為衫領唔覺眼,之後睇相你就後悔喇!最好著一件企領嘅恤衫出席畢業禮,企身衫領令你唔洗成日留意條領有冇扁,專心影「濕醒」畢業相。 2. 要帶小扣針同髮夾 如果你件衫冇鈕勾實件學系披肩個小線圈,一定要帶定小扣針,唔係叫你勾落件袍度,係將披肩中間果個小圈同畢業袍個唯一的扣穿埋一齊,得左。 記得帶以下呢種類型嘅髮夾,梗係要黑色啦,左右各一個已經可以固定頂畢業帽,咁就唔洗插勁多隻普通髮夾係頭喇。 3. 上台前睇下自己件學系披肩有冇斜 十個有五個畢業生上台時候件學系披肩係趺埋一邊架。因為緊張,上台次前冇留意自己件畢業袍著得整齊與否,都係果句,睇相睇片果時你就後悔喇。我又唔會建議大家用扣針扣實,畢竟只係租袍,無謂為左自己吉爛件袍呀。排隊上台果時低頭望一望,整理一下就萬無一失。 4. 唔著慣高跟鞋嘅女仔著平底鞋上台 畢業禮當日望住部分女同學一步一驚心,腳震震咁上台,好似太空漫步咁行去台中間鞠躬再落台,真心慶幸自己著平底英倫鞋上台。大家係一個咁緊張嘅場合加上平時少著高跟鞋,又要鞠躬又要上苔樓梯,成件事出事/出醜嘅機率係80%。建議唔著慣高跟鞋嘅女仔都係影相先換高跟鞋喇。 5. 女仔妝唔好太淡 我當日塗左隻比較淡嘅唇膏,影出黎嘅相都唔夠「濕醒」,可況咩都唔塗?! 好彩我化全妝加上畫左條比平日粗嘅眼線先力保不失。如果唔化開妝,都建議塗唇膏加萬二分燦爛笑容搭夠,影出黎嘅相差好遠架。 6. 男仔要打領帶 我畢業禮當日有打同冇打領帶嘅男仔之中,有打領帶嘅男仔型好多,講完。 7. 畢業公仔size要適中 我之前買左個大公仔送俾阿奀做畢業禮物,買得公仔就想拎去周圍影畢業相,咁就出事喇。一個人兩隻手,要拎相機腳架神棍畢業袍畢業帽私人野,再加埋隻巨型畢業公仔,搞到阿奀約親同學影相都帶好多行李。 最後恭喜今年畢業嘅你完成人生一件值得高興嘅事,未來嘅路仲有好長,加油。 Blog: http://kongleicouple.blogspot.hk/