不經不覺又兩年,呢個9月真係好忙,本身已經有好多deadline要趕。因為地震停工咗,所以有好多event由月頭改到月中月尾。到今個月最後一個工作天,決定放假俾自己抖抖。 無特別嘢想做,就去outlet行吓。近來天氣轉涼,順便睇吓準備換季。呢兩年都成日嚟outlet,到今日去到Natural Beauty Basic,個售貨員忍唔住叫我出返張point card。買滿100円有1分,outlet入面間間舖都儲得,而且全國三井outlet都可以儲,當幫補下無旅客折扣同退稅的優惠。 話說出point card之前已經喺其他舖買咗嘢,之後走返轉頭問可唔可以儲返point,好好彩係得嘅。以前的我一定唔會走返轉頭問,呢兩年自己都轉變咗好多。一個人喺外地生活,真係要膽大心細面皮厚,尤其係言語不通,好多時真係要硬住頭皮去解決。 好多人都好奇點解會放棄香港一切而走過嚟重新開始?我當初純粹想,究竟到我退休的時候,自己想有一啲點樣的回憶?如果我繼續喺香港,可能係每年人工加幾多,去咗邊旅行,買咗幾多嘢。既然有一個機會,就為自己的人生創造唔同的回憶。好感謝上天俾我呢個機會,亦為自己呢份勇敢自豪。