地震後呢幾日都係留喺屋企,雖然留喺屋企,但係都好難好好休息。 第一就係餘震,星期四五餘震比較頻繁,星期六逐漸減弱,到尋日日間還好。偏偏大家以為告一段落,一個較強的餘震又喺晚間出現。尋晚本身都諗住瞓,喺廳睇緊雜誌,突然感覺到震,即刻進入戒備狀態。過咗一陣警報先響,呢一下大約3級,但係不尋常地長,成10分鐘先真正覺得停下來。地震後一星期未夠,都仲係好活躍,要小心。 第二就係要執屋,地震後廳地下全部都係不同的物件,好多都係喺櫃跌出嚟。首先將原本打直放的大櫃轉成打橫放,好彩當初買的時候就睇中呢個設計,本身係想悶的時候轉下款,而家當然係為安全理由。之後到厨房,好彩無打爛嘢,但係就將本身擺上面厨櫃的碗碟擺返近地面,咁又玩咗一日俄羅斯方塊。 大家問我心情點,當然唔輕鬆,但係一直活在當下的我,經過今次之後,又提升到另一個層次。呢幾日一直喺戒備狀態,其實好攰,係體力的挑戰。皮膚都出晒壓力瘡同小唇瘡投訴,幸好係weekend可以抖抖,情況未至於不受控制。 大部分的地區都恢復水電,日常生活逐漸恢復正常。電力公司呼籲大家節電,所以交通班次都會有所調整。今日去超級市場補給,好多貨架都係空嘅。暫時未有奶類食品賣,新鮮的肉同海鮮都只有少量,嚟緊呢個星期應該都係維持簡單煮食為主。