網絡終於比較穩定,終於可以喺呢度報個平安。尋日全日的網絡都似有還無,僅有的電與網絡都主要用來跟家人報平安及同事保持聯絡。 呢次地震嚟得好快,基本上警報響的一刻已經強烈震緊。當時係熟睡狀態,本能地用攬枕蓋住頭,等強震一過,真係成個人醒晒。基本上到4點半都不斷有餘震,大約3至4級的程度。發現風扇唔郁,就知道停電。之後落床睇,跌到成地都係嘢,確定無爛嘢就再瞓多陣。 天光開始收到同事訊息,如果可以的話,就返工。起身再確定有水,可以梳洗就返工。出門口前好在有日本朋友提我儲定水喺浴缸,搞掂就出門口。落到街一片寧靜,便利店有人排隊買物資。要注意停電無交通燈,大家都好小心揸車讓路俾行人。 返到工已經有少部分同事返咗,大家都幫手睇下有無嘢爛,同執好d嘢。因為無水無電,幫完手就返屋企休息。本身想去超級市場,但係見到排緊隊,自己單身一個,無老無嫩,都係晏少少先去。返屋企食啲嘢,就瞓一陣,連續兩晚打風加地震都瞓得唔好。瞓醒之後發覺有返電,真係好好彩,因為到呢一刻都仲有人無水無電無煤氣。再去超級市場,大家好有秩序排隊,無電的情況下全人手操作,買咗少少食物就返屋企。 基本上全日由上午8點後,network係非常有限,line係好間中先收到一兩個訊息,至於WhatsApp還好,隔一至兩個鐘都會收到訊息。地震後都有上facebook報平安,為左慳電慳data,訊息只可以優先覆屋企人。嘗試喺facebook出post報平安同埋叫朋友唔好private message,當時大家都要用網絡聯絡,盡量減少用量。因為network問題,尋日香港收到的資訊可能比我更多,大家問我呢邊情況點,其實我知自己安全之外,無嘢可以答到。 基本上到今日零晨mobile network開始穩定,到天光開始有返家用WiFi。好好彩係屋企有水有電有煤氣,可以簡單煮食,有其他區仲係百無狀態。專家預測一星期內有機會再有高達七級的地震,唔可以掉以輕心。