23 May
1:11 am

[揾食篇] 港大人嘅四大必食推介

雖然大學生活忙碌,但作為美食愛好者嘅小編,喺忙讀住書同上莊之餘,當然都仲會繼續努力發掘各種美食啦!身為一個港大人,今日就等我帶大家一齊周圍「揾食」,同各位介紹一下喺香港大學附近各種「便靚正」嘅美食啦!

  • 波記燒臘粉麵店

波記燒臘粉麵店係一間位於西環石塘咀嘅港式粉麵餐廳,喺香港大學行落去只需要10分鐘就到,十分方便。呢間老字號最出名嘅就係肉汁爆棚嘅燒鵝脾瀨粉,當然其它燒臘都係值得一試嘅名物,只需要平民價錢就可以食到嘅米芝蓮餐廳嘅水準,你仲等咩啊?快啲去「波記」食番餐啦!

  • 新興食家

無論你係趕緊paper定忙緊上莊嘅活動,只要係喺零晨三、四點嘅時候未瞓,香港大學嘅學生都不期然會諗起呢一個飲早茶嘅好去處—新興食家。新興食家係一間位於西環堅尼地城嘅廣東舊式茶樓,由堅尼地城站行過去只需要大約5分鐘。呢間小店嘅特色在於佢係凌晨3點就會開門營業,所以真係啱晒各個想食宵夜嘅夜貓子或者想一齊飲早茶嘅三五友。而佢最出名嘅就緊係外脆內滑嘅炸鮮奶同埋爆汁嘅流沙包,有唔少人都係因為呢啲名物先慕名而來㗎!

  • 金祥排骨麵

金祥排骨麵位於西環西營盤,係一間食上海排骨麵嘅38年老字號,見證住香港西環嘅多年變遷。喺呢度最遠近馳名除咗有即叫即炸、外脆內嫩嘅新鮮排骨,仲有滿滿嘅人情味。所以,小編都要喺度推介一下呢間小店,大家有時間不妨去懲罰吓佢啊!

  • 宜記甜品

宜記甜品係一間位於西環的港式甜品舖;但唔好俾佢嗰名呃咗喎,嗰度除咗有「便靚正」嘅糖水食,其實仲有各種飯餐、撈麵任君選擇。而且,宜記唔單止係食物款式眾多,另一個特色就係佢嘅嘢食都好大份,包你用好抵嘅價錢就可以食到飽哂!據小編所知,基本上喺港大住hall嘅人都好鐘意去呢度食宵㗎!

#過萬優質私補導師資料

#24H CS專線配對一對一視訊/私補老師

This entry was posted in 中國菜, 中式食譜, 個人, 健康養生, 好去處, 家常小菜, 家庭聚會, 搵食優惠, 校園進修, 消閒, 特色餐廳, 甜品/飲品, 甜品糖水, 知己聚會, 知識, 社交, 米芝蓮餐廳/廚師, 興趣, 街頭小食, 飲食文化, 香港 and tagged , , , , , . Bookmark the permalink.