今次五月既澳洲之旅,十日時間去左三個城市,順次序為悉尼、布里斯本加黃金海岸。首先,第一篇就同大家分享如何輕鬆辦理簽證、買機票、租車等等,下篇再同大家分享今次入住左非常滿意既AIRBNB啦. 辦理簽證 香港居民辦理澳洲旅遊簽證一點都唔複雜,係以下呢個網頁https://www.eta.immi.gov.au/ETAS3/etas 申請ETA便可,按步輸入番護照既個人資料。每人費用為AUS20 (匯率大概AUS1:HKD6) 網上可以用VISA付費。完成後,會有電郵同訊息確認。審批時間大概一至兩個工作天。如果仲係擔心唔知批左未,可以上番個網到check 番。 入境過關既時候,唔需要印任何文件。佢有一部自助機,SCAN番本PASSPORT,影張大頭照就過得。 機票 由香港出發,我地首先直航到達黃金海岸機場,飛行時間大概係九個小時。早排見香港航空做緊優惠,所以直航機票機先二千八百蚊,包2件20KG寄艙行李同7KG手提行李。機型座位係2-4-2。我地當日係夜機出發,到達黃金海岸機場為早上七點多。不過早前香港航空宣佈十月尾會停飛呢條航線直至另行通知。 點擊圖片放大 +2 黃金海岸機場唔大,轉內陸機好方便。如果係悉尼轉內陸機,大家就要留意番係幾號客運大樓喇. 轉內陸機預一個半小時前CHECK-IN便可,太早到COUNTER可能未開。 我地搭上午十時既飛機去悉尼。選乘TIGER AIRLINE,是廉航,由黃金海岸去悉尼機票只係四百蚊港幣. 黃金海岸去悉尼既內陸機班次好密,一日有五班航班。航班係同一個GATE落客然後上客。內陸機機型座位係3-3,飛行時間大概係一個多小時。 我地之後係悉尼飛去布里斯本,選乘澳洲維珍航空,同樣係一個多小時既飛行時間,機型座位都係3-3,維珍航空會提供小食同飲品,機票貴TIGER少少,五百幾蚊港幣. 時差 香港同悉尼、布里斯本、黃金海岸呢三個城市夏令時間都係有兩個鐘既時差,快香港兩個小時。冬令時間就會相差三小時. 天氣 五月澳洲由秋開始轉冬,早晚天氣清涼,只有十度左右,日間天氣和暖,有廿十度左右。非常適合黎避暑。 租車 由悉尼飛去布里斯本之後,我地就係當地拎車喇,諗住係布里斯本同黃金海岸自駕遊。今次揀左係透過AGENT Rentalcar係East Coast Car Rentals (www.eastcoastcarrentals.com.au/)租車。到步後,可以係INFORMATION DESK借電話打俾間公司,佢會搵SHUTTLE BUS接你。我地租左部五人車,剛剛好放到三大一中既行李箱,同坐到五個成人。係布里斯本拎車,黃金海岸還車。還車記得要入番滿油。 建議如果THROUGH AGENT BOOK車,可以唔使買車保住,因為去到租車公司佢又會強烈建議你買多份。分別在於係AGENT買,有咩意外你係賠完俾租車公司之後CLAIM番AGENT,咁倒不如直接拎車既時候係租車公司買。 另一樣,租GPS。GPS多以ADDRESS形式去SEARCH,用電話既GOOGLE MAP可能SEARCH得仲快,又可以省下呢筆錢去玩去食。 下篇介紹澳洲既AIRBNB俾大家!