#旺角美食 多就係人都知!競爭咁大真係冇番咁上下料子都唔使旨意生存到!不過哩間嚟自新加坡嘅過江龍火鍋店都真係有啲嘢,一到步已經人氣爆燈,成為網紅新貴!#麻辣火鍋 店竟然主打女性市場,全店都用上粉紅色系,心機咁重唔怪得姊妹們齋睇相都已經心心眼啦! 仲唔第一時間去幫襯兼打卡咩,搵姊妹陪自然唔會say no,男朋友仔就梗歡喜啦,難得娘娘唔嫌打邊爐熱氣又麻甩!哩間火鍋店唔係玩放題,不過都有時限入座起計2小時,走中高檔路線同你逐碟計,不過由於海鮮選擇比較少,所以埋單都係每人$250左右,還可以啦~~ 講到招牌菜應該係哩到嘅兩款特色湯底,一款叫膠原蛋白美顏鍋$110,雪白色嘅湯頭聽講係用瑤柱、老雞、 豬骨再加埋豬腳,慢煮8小時而成,口感黏稠,咁重骨腸真係夠晒養顏架! 另一款叫 滋補養生香辣鍋$85,睇得出好足料,雖然紅卜卜咁但唔會太辣太麻,重藥材料又唔太嗆,味道啱啱好!哩個幾正! 食物選擇唔算太多,丸類、餃子都係手功做唔係用現成。Menu入面仲有啲台式鍋料,好似毛肚、鴨血之類。至於牛肉,海鮮選擇其實都唔算太多亦冇咩特色,所以個人認為哩到都係姿勢大過實際!試過就算啦!約埋成班朋友著齊粉紅色衫嚟幫襯都幾好玩呀!無可否認今時今日玩味比食味重要! 順帶一提,餐廳仲有一間兒童空間,家長們可輪流帶小朋友去放電,接力開餐!哩個idea又真係好貼心!抵讚呀~ 美滋鍋 BeautyInthePot 地址:旺角登打士街56號家樂坊8樓803舖 電話:3162 8238 營業時間:12:00~03:00 旅遊網誌:http://travelermel.blogspot.com/ Instagram:https://www.instagram.com/followme_lody/ #旺角打邊爐 #旺角麻辣火鍋 #粉紅控 #網紅打卡店 #mongkokfood #hkfoodie #hongkongblogger #美露迪