唔知大家有冇睇過AGA《一》的MV呢? 我有次無意地係電視睇到個MV, 就鐘意咗MV裡面間cafe了. 當然亦都鐘意咗首歌. 或者大家對《一》的印象, 可能係兩年前成日係M記播嘅嗰首洗腦歌: ...尋尋找找為何都找不到... 睇咗幾次個MV, 終於知道間cafe叫Common Ground. 不過之前一直有嘢忙緊, 未有機會去. 兩年後,終於有時間黎了. 其實Common Ground對於我依個路痴黎講都幾難搵, 出動埋Google Map都搞唔掂. 心諗...真係同首歌一樣尋尋找找為何都找不到~ 之後發現原來係PMQ對面有條好隱蔽的石梯, 沿石梯上去就會見到Common Ground. 終於都搵到了. 可能因為平日的關係, 店內的客人唔算多. 多數的人都係帶埋電腦, 坐係度一邊做嘢, 一邊歎咖啡. 我都覺得坐係度睇書或用電腦都幾舒服的, 靜靜地咁, 唔似其他cafe咁多人, 又嘈. 最後我叫了一杯Mocha同埋一件cake. Mocha HK$48 拉花好靚, 但味道就同其他cafe飲的Mocha差不多. 今日的daily cake: American Cheesecake HK$55 我好鐘意依個cheesecake. 佢個質感係比較實, 裡面還有少少檸檬皮. 芝士味濃, 而且還有淡淡的檸檬味, 好好食. 食的時候我覺得有"叮"一聲的感覺. 總括來說, 食物賣相唔錯, 味道也很好. 價錢方面, 一杯咖啡加一件cake HK$103, 都合理. 最讚係環境, 真係好靜, 好舒服. 平日返工好忙好攰, 黎到依度真係會俾到你一種放鬆的感覺. Common Ground 地址: 中環城皇街19 號地下 營業時間: 星期一至五: 10:00-19:00, 星期六至日: 09:30-19:00