Day 7: 海法>巴哈花園>特拉維夫>Carmel Market 前一晚黎到海法, 遠望巴哈花園, 今日我地黎到花園入面, 近距離睇真d哩個花園, o係哩度仲可以睇倒成個海法, 之後我地就趁安息日黃昏冇車之前出黎特拉維夫, o係特拉維夫渡過我地o係以色列境內第一個安息日 ************************ 因為今日我地只係去巴哈花園, 去完返黎check out就出返特拉維夫, 時間比較鬆動, 所以8:15am先起身 海法哩間hostel係包早餐, 早餐好簡單, 都係麵包同咖啡 麵包都係哩度o既中東包, 諗住叮返熱佢, 仲衰, 又乾又韌, 好彩有d果jam叫做有返d味, 旁邊o個杯係芝麻咖啡, 有粒粒芝麻, 幾得意 哩間hostel最值得讚係哩個Give n Take Corner, 有唔要o既野可以放o係度, 睇下有冇其他旅客o岩用 行出hostel, 又影下哩個例景先 一路影時, 其實我地亦都o係度等緊巴士, 因為去巴哈花園o既巴士就o係hostel門口出面, 非常方便 唔好以為好近可以行去, 因為巴哈花園得兩個入口, 一個係頂層一個係底層, 而遊客係唔可以o係下面行上去o既, 想入去參觀, 就只可以o係頂層入口, 跟入面o既導賞員行落黎 去巴哈花園可以搭136號巴士, 每15mins有一班, 車程20mins, 車費ILS$5.9, 而巴海花園就唔洗入場費, 每日就只有10am哩一場導賞, 如果錯過左, 就唔可以入去, 只可以o係出面遠望 遊客要入去巴哈花園, 都一樣要著上及膝o既褲或裙, 好彩我隨身都有帶住條披肩, 唔係真係企左o係度 o係花園遊覽時, 即使你唔聽導賞員講解, 但亦唔可以離開得太遠, 我地就因為影相成日都惰後, 導賞員都會不時催促我地行快d o係哩度可以從高處望倒成個海法, 景色真係非常壯觀, 下面就係我地住o既hostel所屬o係德國小區 講返小小哩個巴哈花園背景, 佢係屬於巴哈伊教, 哩度包括花園同一個聖殿, 中間白色金頂o個個就係聖殿, 哩個教o係伊朗創立, 主張所有教派唔應該有隔閡, 世界大同, 有d似中國o既儒家思想 而o係中東地區o既非伊斯蘭教, 一般都會被認為係異教而被追殺, 所以當年始創人就不斷逃亡, 最後o係阿克過身, 而陵墓就o係海法哩個聖殿入面, 所以哩度對於巴哈伊教徒亦係一個重要聖地 點擊圖片放大 趁導賞員o係旁邊講解, 我地就不停影相, 不過花園入面o既職員就叫大家唔好行落去住 如果要企埋去影相, 最多亦只可以行到去閘口位, 因為遊客一定要等埋導賞員一齊行落去 終於行得落黎 點擊圖片放大 哩度真係好乾淨整潔, 可能又因為遊客一定要跟住導賞員行 我地就係o係上面行落黎 點擊圖片放大 +5 落到黎底層花園, 就可以自由活動, 唔洗再跟住導賞員行 哩個就係擺放左創教人Baha'u'llah陵墓o既聖殿 點擊圖片放大 哩度開始係唔可以著鞋, 入面亦唔可以拍攝 點擊圖片放大 +4 行左差唔多1hr我地就出返黎, 之後搵路不斷向山腳行, 就可以去返我地o既德國小區 哩個就係底層花園 o係底層花園一直行, 就係我地住o既hostel 返hostel check out完後, 我地就行去火車站 由hostel大約行15mins就到海法火車站 返待拉維夫o既火車每半個鐘有一班, 車程約70mins, 車費ILS$27.5 今次我地坐哩架雙層火車 雖然火車外表睇落有d殘舊, 不過入面都好新淨, 最緊要有冷氣, 正呀~!! 一到左特拉維夫, 我地即刻仆去哩間Ika Choclate朱古力店, 因為今日係星期五, 猶太人o既安息日o係星期五黃昏開始, 但有部份巴士/商鋪會提早休息, 我地知道哩間鋪今日開到2pm, 我地1:30pm去到時佢已經閂左門 正當我地以為要摸門釘時, 竟然俾我地o係轉角見倒準備開佢架電單車走人o既老闆, 本來佢話有事諗住提早閂門, 但佢見倒我地咁遠水路黎到, 就開返門俾我地, lucky~!! 咁遠黎到哩間朱古力店梗有原因, 因為店主曾經贏過世界朱古力大賽, 而全以色列就只有特拉唯夫哩間店, 所以點都要買d朱古力返去試下 哩度o既朱古力唔算好多款, 但就幾特別, 價錢唔算貴, 哩d一小包大約幾十蚊港紙 我地每樣買左少少, 最左長條形o個盒係店主送俾我地, 其他夾埋ILS$99 睇店主幫我地包朱古力, 就知道佢非常有要求, 佢話朱古力最好放o係22度倒o既環境, 佢用保鮮紙逐包朱古力幫我地包好 之後仲要用雪梨紙包好再放入紙袋, 話等d朱古力o係炎熱天氣下冇咁易溶, 叫我地返去要放入雪櫃, 食前要攤返半個鐘, 拆左保鮮紙就最好一次過食晒 哩隻散裝朱古力, 原本要ILS$6/粒, 店主竟然送左5粒俾我地, 超大方~!!我地等巴士時就食左佢 之前提到以色列o既安息日係由星期五黃昏後去到星期六黃昏前, o係哩段時間所有巴士同火車都會暫停服務, 要搭車就只有哩d的士或阿拉伯人o既巴士 因為而家仲有巴士, 我地就趁有巴士, 去左附近o既市中心行下先, 之後先返去特拉維夫o既hostel 之前一直搭o既都係車頭有個X字o既Egged Bus, 而哩架白色o既巴士係屬於另一間巴士公司Dan Bus, 車費同樣係ILS$5.9, 不過就冇得網上check班次 2:30pm我地先黎到哩間Shakshukia食lunch 特拉維夫o既消息比耶路撒冷更貴, 但哩間食店o既價錢都仲可以接受 叫左一份Spicy Merguez Sausages, ILS$49 雖然都係包, 但已經好過中東包好多, 店主話哩個都幾辣, 我地問佢有幾辣, 同泰國o既辣比係點, 佢就話佢地冇泰國咁辣, 食落大約係中辣咁, 唔會辣得太辛苦, 幾好食 言談間, 店主仲話佢黎過香港, 好興奮咁講佢去過星光大道見倒李小龍像 食完我地就去左Frishman Falafel買定今晚o既晚餐 中東包ILS$15/個 唔知寫乜, 求其叫佢乜都要d 點擊圖片放大 +2 之後我地又再去另一間Falafel Ratzon再買多個中東包今晚食, ILS$12 3:55pm我地黎到哩個Carmel Market, o係度行埋先返hostel 哩度就似花園街咁, 有d凌星野, 亦有野食賣 點擊圖片放大 +4 以色列有好多果汁賣, 一直都想試, 但o係耶路撒冷都冇機會, 今日都算係最後機會, o係哩個market終於俾我地見倒有果汁 一杯ILS$20 雖然唔算平, 但真係好足料, 睇住佢加左好多生果, 除左加左少少冰令佢變凍, 都冇加過水, 等緊期間, 仲聽倒隔離個食客話"The best in the town" 真係好大杯, 連個蓋都有, 店主渣完見倒晒落個杯度仲有一小杯倒唔晒, 都俾埋我地, 哩杯有蘋果, 車厘子, 香蕉, 薯仔, 都幾好飲, 咁熱天氣飲返杯果汁真係正~!! 行完market我地就搭返巴士返hostel, 附近哩間am:pm係一間連鎖便利店, 比香港o既便利店大間, 原來安息日都有開, 但價錢又唔算太貴, 我地都o係度入左d貨 我地今晚就係住哩間Milk & Honey Hostel, 佢分左幾間大房, 其中哩間係三層床的 而我地今晚訓o既係哩間雙層床o既房, $180/床包早餐, 唔好睇佢好似好亂咁, 佢成日都有冷氣, 溫度大約23度, 唔太熱唔太凍好舒服, 而且每張床都有塊簾, 私隱度唔錯, 有wifi上網都快, 成間hostel有幾個廁所同沖涼房, 都乾淨同唔洗點等, 不過因為多人住, 所以都冇得揀訓邊張床 因為安息日好多食店都關門, 所以我地沖完涼執完野, 就o係hostel個廚房食我地頭先買返黎o既晚餐 點擊圖片放大 +2 哩款果汁好好飲, 已經買左幾隻唔同味 7:30pm邊食野邊睇波, 食完o係common area上下網, 今晚終於可以早d訓