一向唔會為咗食嘢而去一啲好偏僻嘅地方! 不過係朋友介紹下,足足行咗20分鐘嘅路程, 嚟到粉嶺一間工廠大廈食嘢!由粉嶺火車站落車行到Cafe其實只需要十分鐘左右, 一路行覺得好不安,因為除咗曱甴沿路鬼影都冇隻!非常擔心佢已經關左門 但神奇嘅事發生左啦,幫我地上到一樓,就聽到嘈雜嘅聲音!而餐廳設計非常有心思,門口畫咗好多壁畫!行入去氣氛超好!昏暗嘅燈光,配上幽默嘅卡通牆壁! 唔好以為WTF係講緊粗口,其實係What The Food Cafe!!真係令想入非非! 望吓個餐牌先,有西冷、豬肋骨都係$76咋, 不過朋友指名話一定要食鰻魚蛋包飯!一向係肉食獸嘅我,就忍忍口睇吓呢個蛋色食有幾巴閉先! 餐湯及餐包 如果佢係一碗普通嘅羅宋湯,我就唔會刻意去到介紹, 但佢係我飲過最好飲嘅羅宋湯!大大粒薯仔同紅蘿蔔,牛肉都超香!而個湯都非常杰身,仲正過啲老火湯! 餐包睇落去似自家製,雖然個樣呃得下人, 亦都外脆內軟,但其實冇乜味。 鰻魚蛋包飯($76)連餐湯餐飲 落單大概十分鐘,鰻魚飯就到啦!食咗一口,真係「嘩」一聲叫出嚟!鰻魚唔單止大大條,而且 仲好厚肉好肥味,冇骨而且勁Juicy!!!蛋嘅分量好多,目測有3隻!蛋上淋上大量鰻魚汁,正! 一定要講一下個飯,用鰻魚汁炒成,同時落咗大量麻油。鰻魚同埋有嘅香味混合,真係好幸福啊! 青蘋果梳打(跟餐加$18) 個杯閃閃發光超級得意,原來杯底裝咗三粒燈。味道方面,就普普通通啦!另外唔同味道顏色亦都唔同,大家不妨試吓! WTF燒豬肋骨($76)連餐湯餐飲 可以揀BBQ味、Honey Mustered、仲有冬陰公!其實我對冬陰公味好有興趣,不過朋友揀咗另外2隻味。我個人覺得蜜糖芥末比較特別,而豬肋骨都好林。不過就份量小咗啲,大家揀飯同意粉會比較飽肚。 What The FOOD Cafe 地址:粉嶺業豐街13號多利工業大廈1樓F室 電話:2677 1303 營業時間:星期二至日: 11:00-22:00 星期一休息 —————————————- Facebook page: https://facebook.com/Hkgyummyyummy/videos/1076053495799942/ Youtube Channel:https://www.youtube.com/channel/UCZDciZKDSeFnVOqNSxdhvnA —————–