日本人嘅食物入面好少有辣嘅元素,最辣嘅調味都係七味粉或芥辣。不過唔好唔記得佢哋有仲有地獄拉麵啊!經過我四處八卦,原來喺荃灣有一間小店有勁辣拉麵同全港首創芥末拉麵。聽到芥末拉麵我已經心動不已,即刻衝去試食先! 重點推介:特上配料 特上即包含豬肩肉及豬腩肉。豬肩肉較瘦,肉味亦較重亦不油膩 ;豬腩肉則重油香,味道於口腔內久而不散。 建議各位選擇特上拉麵,一次過試哂兩種味道! 特上日本芥末拉麵($93) 呢碗芥末拉麵不單上湯底係青色,就連麵條都加入芥末,當拉麵放到枱上就已經嗅到香濃嘅芥末味。麵條用上幼麵,掛湯能力高 ,每一口湯麵吸盡芥末湯底嘅味道。雖然整碗麵都青咇咇,但只有少許攻鼻,湯底愈飲愈香濃。食前要先攪拌,因為拉麵仲加入芝士,令拉麵味道進一步昇華。 辣度:★ 推薦度:★★★★★ 特上辛辣味噌拉麵($93)普通/激辛 辛辣味噌拉麵分為兩種辣,包括普通辣同激辛。大食妹食得辣,不過都係試咗個普通辣先。試咗一啖湯都幾香味噌喎,入口已感受到到辣味。不過我建議食得辣嘅朋友試下激辛,普通辣都算好辣。 麵條方面,今次就揀咗來自北海道嘅曲麵。口感同幼麵截然不同,麵比較粗身,咬起來相對彈牙爽口。 辣度:★★ 推薦度:★★★★★ 靜岡抹茶汽水($18) 抹茶汽水原來係來自日本靜岡縣!入口帶有清淡嘅抹茶味,少少甜有啲似清淡版嘅忌廉,值得大家試下! 店內都係一群年青人主理,負責人曾到日本拜師,鑽研日本飲食文化。再以傳統日本拉麵作基础,加上自己嘅創意先能夠做出不同凡響嘅創新食品。最令人讚嘆係店家嘅堅毅,湯底能夠咁濃郁,係因為每日用三十公斤豬骨,通宵煲十二小時! 要夠新鮮,先可以送到客人面前。 店內裝修亦特別有一番心思。不單止環境舒適,更為食客提出免費電話叉電服務,既體貼又窩心! 叉電服務 ------------------------------------------------- 豚道樂 Butadouraku 地址:荃灣大河道63號卓明大廈地舖 營業時間:星期一至五: 12:00-15:30; 17:30-22:30 星期六、日及公眾假期: 12:00-22:30 電話:3956 9163