上年年尾不敵領展嘅變身魔咒而搬離禾輋冬菇亭嘅陳根記,已經喺石門重開! 講起沙田禾輋陳根記,你會諗起鍋氣、庶民滋味嘅香港特色,大排檔陳根記遠近馳名,可惜上年年尾不敵領展嘅變身魔咒,喺街坊一片嘅不捨聲中離開禾輋冬菇亭。好在,老闆決定喬遷至石門,沙田友可以繼續食陳根記,SPD4459小編都要去支持下新店至得! #SPD4459 新店鄰近石門馬鐵站,沙田站亦有小巴直達,一樣方便。嚟到嘅第一個感覺:細咗好多,少咗好多枱T.T 以前嘅禾輋陳根記,有成100張枱,日日爆場,又喧嘩,又熱鬧。搬咗嚟石門,地方細咗好多,SPD4459小編估計大約係以前嘅5分之1咁大。不過街坊熱情不減,好多人等位。裝修方面,明顯想呈現番以前禾輋冬菇亭內嘅感覺,雖然新店係商場地舗,但佈置到好似大排檔咁:擋風透明膠布、天花板掛住招牌菜嘅相、圓形膠櫈等等,好有大排檔feel,但就乾淨咗好多。 事不宜遲! 望望餐牌,叫番幾個招牌菜食下先!決定好食乜就落單,陳根記特色之一:要食乜嘢自己寫落單XD #SPD4459 首先試試招牌菜 - Wasabi蟹籽手撕雞 ($75/例) #SPD4459 手撕雞嘅味道仲好味過以前XD Wasabi味道攪得均勻,好入味。雞肉嫩滑,配埋爽口嘅海蜇、青口絲同埋蟹籽,口感豐富又好味。 紅燒乳鴨 ($58) 略嫌細隻咗少少,不過乳鴨嘅皮炸得好香脆,滾油鎖住肉汁,咬落去肉鮮多汁非常香口。 甜香麻辣蝦 ($155) #SPD4459 呢個蝦真係唔講得笑,SPD4459小編真係要出盡力推薦大家去試! 中蝦炒得乾身惹味,連啲殼都炒到好脆,夠哂鍋氣,夠哂香,盡顯師傅功力! 呢個蝦佐料十足,單單係辣椒已經有3種,再加埋芝麻、豆豉、陳根記嘅特製醬料一齊炒,辣得過癮又惹味,鐘意食辣嘢同香口嘢嘅話,呢個蝦一定岩你。$155碟嘅麻辣蝦,小編數過都有7隻中蝦,岩兩至三個人叫一碟。 蟹肉海鮮羹 ($85) #SPD4459 蟹肉海鮮羹配料有切粒嘅蟹肉、豆腐、蟹柳、蝦仁、尤魚、魚肉、帶子、蛋花等等。個羹清清地,食完個麻辣蝦之後飲岩哂。 芒果河粉伴雪糕 ($38) #SPD4459 早幾年嘅禾輋加埋甜品部,搬到嚟石門之後仍然有甜品食。今次小編叫咗人氣王-芒果河粉伴雪糕。小編都幾鐘意呢個甜品,因為上面加咗爆珠,一咬落去會爆啲糖水出嚟,好過癮。香甜嘅芒果加埋椰汁味濃嘅滑滑河粉,完美。除咗芒果河粉,芒果一口脆都係招牌甜品,大家不妨試下。 如果有去過禾輋嘅陳根記,可能都會見過訓喺收銀入面嘅狗狗,佢就好似陳根記嘅吉祥物咁,有時仲會見到老闆帶佢去散步;不過聽啲伙記講,搬左嚟石門之後,狗狗就冇落嚟舖頭啦,因為新舖有樓梯級,狗狗年紀大行唔到。 總括而家,新舊陳根記嘅差異在於:地方細左好多、冇咗狗狗鎮守;不過環境乾淨咗,又可以使用商場內嘅洗手間。唯一不變嘅,係仍然咁好味、咁旺場同埋充滿人情味。 S 【陳根記小知識】:陳根記老闆唔係叫陳根XD老闆名叫周恒,陳根記嘅原身係雲吞麵舖,當時嘅老闆搵人頂手,周老闆接手後轉營炒蜆、生炒骨、魚雲湯等炒小菜。因為小菜受歡迎,越做越大,由最初25張枱,做到35年後,禾輋陳根記擁有100張枱,炒爐一個變八個,日日爆場,堪稱大牌檔傳奇。 地址:京瑞廣場2期地下5號舖 (石門站旁) 營業時間:下午5:30至凌晨1:30 作者:SPD4459 – A級搵食團 – 硬食王Will (一級資訊兵) #SPD4459 – 我們是POLYU SPEED ( SPD4459 – Internet Marketing and Public Relations ) 的 Part-Time 學生,最喜歡瓹竉瓹罅找尋香港性價比高的地道小食,中西美食!如果你想跟我們一起食盡香港的美菜佳餚,記得緊貼我們,向美食出發!